ચાર જાન્યુઆરી પહેલાં સિડની નહીં જાય ભારત-ઑસ્ટ્રેલિયા
ફાઈલ તસવીર
ઑસ્ટ્રેલિયન ક્રિકેટ બોર્ડે મંગળવારે જ સ્પષ્ટતા કરી દીધી હતી કે ત્રીજી ટેસ્ટ શૅડ્યુલ પ્રમાણે જ સાતમી જાન્યુઆરીથી સિડનીમાં જ રમાશે. જોકે ગઈ કાલે વધુ સ્પષ્ટતા કરતાં કહ્યું હતું કે ‘બન્ને ટીમો, ભારત અને ઑસ્ટ્રેલિયાને હાલતરત સિડની નહીં મોકલે. બન્ને ટીમ મૅચના ત્રણેક દિવસ પહેલાં સિડની જશે, ત્યાં સુધી મેલબર્નમાં જ રહીને પ્રૅક્ટિસ કરશે. કોરોનાનો કેર સતત વધી રહ્યો હોવાથી ખેલાડીઓની સુરક્ષાને ધ્યાનમાં રાખીને ટીમને મેલબર્નમાં જ ચાર જાન્યુઆરી સુધી રાખવાની વ્યવસથા કરવામાં આવી છે.’
ઑસ્ટ્રેલિયન ક્રિકેટ બોર્ડના ચીફ એક્ઝિક્યુટિવ નિલ હૉકલે ગઈ કાલે જણાવ્યું હતું કે ‘ગઈ રાત્રે એ વાતની ઘોષણા અમે કરી દીધી હતી કે અમે સિડની જઈ રહ્યા છીએ અને અમે અમારી આ યોજનાનો બરાબર અમલ કરીશું અને એ વાતનું ધ્યાન રાખીશું કે બધુ સુરક્ષિત હોય. બધા ખેલાડીઓ થોડાક વધુ દિવસ મેલબર્નમાં રહેશે અને ટ્રેઇનિંગ કરશે. ત્યાર બાદ ટેસ્ટ મૅચ રમવા સિડની જશે.’
