ખરાબ બોલિંગને લીધે ઇંગ્લૅન્ડ કોચ ક્રિસ સિલ્વરવુડે બોલરને લીધા આડે હાથ
ઇંગ્લૅન્ડ કોચ ક્રિસ સિલ્વરવુડ
ઇંગ્લૅન્ડ અને પાકિસ્તાન વચ્ચે શરૂ થયેલી પહેલી ટેસ્ટ મૅચના પહેલા દિવસે ખરાબ શરૂઆત કરી હોવા છતાં મહેમાન પાકિસ્તાન ટીમે બીજા સેશનમાં સારી લડત આપી હતી. તેમની આ લડત સામે યજમાન ટીમના બોલરોએ કરેલી ખરાબ બોલિંગની ઘણી ટીકા કરવામાં આવી રહી છે. કોચ ક્રિસ સિલ્વરવુડે બોલરને આડે હાથ લીધા હતા. બોલરોને ફટકાર લગાવતાં સિલ્વરવુડે કહ્યું કે ‘અમે ઘણી બધી બાઉન્ડરી ફટકારવાની પાકિસ્તાનને તક આપી હતી જેને લીધે તેઓ ગેમમાં કમબૅક કરી શક્યા. અમે અમારા સ્ટાન્ડર્ડ મૂજબ નહોતા રમી રહ્યા. હકીકત એ છે કે અમે અમારું સ્ટાન્ડર્ડ જાળવી શક્યા નહોતા. સૌથી મોટો પડકાર એ છે કે જો તેઓ ઝડપથી પોતાનું મોમેન્ટમ પાછું મેળવી લેશે તો તમે એની સામે કેવી રીતે ટકી શકશો? વેસ્ટ ઇન્ડીઝ સામે અમે જે પ્રમાણે બોલિંગ કરી હતી એ પ્રમાણે બોલિંગ થતી મારે ફરી જોવી છે. બૅટ્સમેનોને હેરાન કરીને રન બનાવવા તલપાપડ થતા જોવા છે. અમે જાણીએ છીએ કે કેટલાક બૅટ્સમેનોથી પણ અમે ઘણા ઉપર છીએ. જો અમે ગેમમાં ટૉપ પોઝિશન પર નહીં રહીએ તો અન્ય કોઈ આવીને એ સ્થાન લઈ જશે. સમયસર સજાગ થવું જરૂરી છે. પહેલા સેશનમાં પોતાની રિધમ જાળવી રાખવામાં જેમ્સ ઍન્ડરસનને તકલીફ થઈ હતી. હું પોતે એક બોલર રહી ચૂક્યો છું એટલે મેં તેને કહ્યું હતું કે તું એકમાત્ર એવો બોલર છે જે પોતાની ખોવાયેલી રિધમ ફરી પાછી મેળવી શકે છે.’