ટીવી-અમ્પાયરની એન્ટ્રી બાદ વધી ગયા નો-બૉલ

Published: 12th February, 2021 12:23 IST | Chennai

પહેલાં દર ૩૭૭ બૉલે નો-બૉલની ઍવરેજ હવે થઈ ગઈ ૧૪૦ બૉલ

નો બોલ
નો બોલ

આજકાલ બોલરો વધુ નો-બૉલ ફેંકી રહ્યા છે અથવા તો વધુ નજરમાં આવી રહ્યા છે. એનું કારણ ટીવી-અમ્પાયરની એન્ટ્રીને માનવામાં આવી રહ્યું છે. પહેલાં નો-બૉલનો નિર્ણય ફક્ત મેદાનમાં મોજૂદ અમ્પાયર્સ જ લેતા હતા, પણ ગયા વર્ષથી અમ્પાયર્સના સ્તરમાં સુધારો કરવા નિયમોમાં બદલાવ કરીને ટીવી-અમ્પાયરને પણ એને માટે નજર રાખવાનું કહેવામાં આવ્યું છે. ઇંગ્લૅન્ડ સામેની પહેલી ટેસ્ટમાં પણ ભારતીય બોલરોના ૨૭ નો-બૉલની લહાણીને લીધે ભારે ટીકા થઈ હતી. ભારતીય બોલરોએ પહેલી ઇનિંગ્સમાં કુલ ૨૦ નો-બૉલ નાખ્યા હતા, જે કોરોના-બ્રેક બાદ કોઈ ટીમે એક ઇનિંગ્સમાં નાખેલા સૌથી વધુ નો-બૉલ હતા.

ટીવી-અમ્પાયરની એન્ટ્રી બાદ એટલે કે ઑગસ્ટ ૨૦૨૦ના આંકડા પર નજર નાખીશું તો જણાશે કે ૯ ટીમે ૨૦ મૅચમાં કુલ ૩૬,૪૫૪ બૉલ ફેંક્યા છે. એ દરમ્યાન બોલરોએ ૧૪૦ની ઍવરેજથી ૨૬૧ નો-બૉલ નાખ્યા છે. એટલે કે દરેક ૧૪૦મો બોલ નો-બૉલ ફેંક્યો છે. જો ઑગસ્ટ ૨૦૨૦ પહેલાંની ૨૧ ટેસ્ટના આંકડાઓની સરખામણી કરીશું તો જણાશે કે ૩૭૭ની ઍવરેજથી ૧૦૫ જ નો-બૉલ ફેંક્યા છે.

પહેલી વાર અશ્વિને ફેંક્યો નો-બૉલ

રવિચન્દ્ર અશ્વિને પણ ટેસ્ટ કરીઅરમાં પહેલી વાર નો-બૉલ આ ચેન્નઈ ટેસ્ટમાં કર્યો હતો. આ ટેસ્ટ પહેલાં તે ૨૦,૬૦૦ કરતાં વધુ બૉલ ફેંકી ચૂક્યો હોવા છતાં ક્યારેય તેણે લાઇન ક્રૉસ નહોતી કરી.

અશ્વિને ચેન્નઈમાં ૧૩૭મી ઓવરમાં પહેલી વાર નો-બૉલ ફેંક્યો હતો અને ચાલીસેક ઓવર બાદ વધુ એક નો-બૉલ નાખ્યો હતો.

નો-બૉલના મામલે ભારત ત્રીજા નંબરે

ટેસ્ટ ક્રિકેટના ઇતિહાસમાં ઓવરઑલ સૌથી વધુ નો-બૉલ ઇંગ્લૅન્ડના નામે છે. એણે ૧૦૩૧ મૅચમાં ૮૨૬૨ નો-બૉલ ફેંક્યા છે, જ્યારે બીજા નંબરે ૮૩૪ મૅચમાં ૬૭૨૬ નો-બૉલ સાથે ઑસ્ટ્રેલિયા છે. ભારત ત્રીજા નંબરે છે અને એણે ૫૪૭ ટેસ્ટમાં ૫૨૭૨ નો-બૉલ ફેંક્યા છે.

પ્રતિ મૅચ નો-બૉલ ફેંકવાની ઍવરેજના મામલે ભારત ઝિમ્બાબ્વે બાદ બીજા નંબરે છે. ઝિમ્બાબ્વે ટીમે ૧૧૦ ટેસ્ટમાં ૯.૮૬ની ઍવરેજથી ૧૦૮૫ નો-બૉલ ફેંક્યા છે, જ્યારે ટીમ ઇન્ડિયાએ ૫૭૪ મૅચમાં ૯.૬૪ની ઍવરેજથી ૫૨૭૨ નો-બૉલ ફેંક્યા છે.

Loading...
 
 
This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK