બંગલાદેશીઓએ વેસ્ટ ઇન્ડિયનોને ૬૧ રનમાં ઑલઆઉટ કરીને જીતી લીધી મૅચ

Published: 19th October, 2011 17:11 IST

ચિત્તાગૉન્ગ: વેસ્ટ ઇન્ડીઝની ટીમ વન-ડે સિરીઝની પહેલી બન્ને મૅચ જીતી લીધા પછી ગઈ કાલે છેલ્લી મૅચ પણ જીતીને બંગલા દેશનો વાઇટવૉશ કરવાના ઇરાદા સાથે મેદાન પર ઉતરી હતી. જોકે બંગલા દેશીઓએ તેમને તેમના સેકન્ડ-લોએસ્ટ ૬૧ રનમાં ઑલઆઉટ કરીને તેમનું મોં કાળું કરી નાખ્યું હતું. કૅરિબિયનોનો લોએસ્ટ સ્કોર ૫૪ રન છે જે ૨૦૦૪માં સાઉથ આફ્રિકા સામે બન્યો હતો.

 

મેઘરાજા વરસે એ પહેલાં બંગલા દેશે વીજળીના રૂપમાં ત્રાટકીને કૅરિબિયનોને આપ્યો કાતિલ કરન્ટ

બંગલા દેશે કૅરિબિયનોને બાવીસ ઓવરમાં ૬૧ રનમાં તંબુ ભેગા કર્યા પછી ૨૦ ઓવરમાં બે વિકેટે ૬૨ રન કરીને ૮ વિકેટે મૅચ જીતી લીધી હતી. ૨૦મી ઓવરના છેલ્લા બૉલમાં વિનિંગ રન બન્યો ત્યાર પછી તરત જ વરસાદ શરૂ થઈ ગયો હતો. તમીમ ઇકબાલે ટીમમાં સૌથી વધુ અણનમ ૩૬ રન બનાવ્યા હતા.

૧૬ રનમાં ૪ વિકેટ લેનાર

શાકીબ-અલ-હસન મૅન ઑફ ધ મૅચ બન્યો હતો, જ્યારે સિરીઝમાં સેકન્ડ-હાઇએસ્ટ ૧૬૪ રન કરવા ઉપરાંત ૪ વિકેટ લેનાર માર્લન સૅમ્યુલ્સને મૅન ઑફ ધ સિરીઝનો અવૉર્ડ મળ્યો હતો. આગલી બન્ને મૅચ મીરપુરમાં રમાઈ હતી, જ્યારે ગઈ કાલની મૅચ ચિત્તાગૉન્ગમાં રાખવામાં આવી હતી. ચિત્તાગૉન્ગની વિકેટ લો અને સ્લો હતી. એના પર બૉલ બહુ બાઉન્સ નહોતો થતો તેમ જ પડીને ધીમો થઈ જતો હતો એટલે બૅટ્સમૅનને શૉટ ફટકારવામાં બહુ તકલીફ થતી હતી. બૉલ ઘણો ટર્ન પણ થતો હતો અને મૅચ પહેલાંના વરસાદને લીધે આઉટફીલ્ડમાં બૉલની ગતિ ઝડપથી ઘટી જવાથી બૅટ્સમેનો બહુ રન નહોતા બનાવી શક્તા.

વેસ્ટ ઇન્ડીઝને ઓપનર લેન્ડલની ખોટ વર્તાઈ

સિરીઝમાં સૌથી વધુ ૨૦૨ રન બનાવનાર ઓપનર લેન્ડલ સિમન્સ ઈજાને કારણે નહોતો રમ્યો અને વેસ્ટ ઇન્ડીઝને તેની મોટી ખોટ વર્તાઈ હતી. બંગલા દેશી ઑફ સ્પિનર નાસિર હુસેને ગઈ કાલે વન-ડેમાં પહેલી બે વિકેટ લીધી હતી અને એમાં ઓપનર કીરૅન પોવેલ (૨૫ રન) કીરૉન પોલાર્ડ (૦) તેના શિકાર બન્યા હતા. વેસ્ટ ઇન્ડીઝના બૅટ્સમેનો ધૈર્ય અને સમજદારી વગર રમ્યા હતા. કૅરિબિયન ઓપનરો ડૅન્ઝા હયાત અને કીરૅન પોવેલ પહેલી ૬ ઓવરમાં માંડ ૧૦ રન કરી શક્યા હતા.

Loading...
 
 
This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK