સ્ટાર દોડવીર હિમા દાસ બની ડીએસપી

Published: 12th February, 2021 12:23 IST | New Delhi

ટોક્યો ઑલિમ્પિક્સમાં ક્વૉલિફાય થવા માટે પ્રયત્નશીલ ૨૧ વર્ષની રનર પાસે એક સમયે શૂઝ પણ નહોતાં, ખેતરમાં ફુટબૉલ રમતી જોઈને પીટીના ટીચરે રનર બનવાની સલાહ આપી હતી

હિમા દાસ
હિમા દાસ

આસામના મુખ્ય પ્રધાન સર્બાનંદ સોનોવાલના વડપણ હેઠળ મળેલી કૅબિનેટે ૨૧ વર્ષની દોડવીર હિમાદાસને આસામ પોલીસમાં ડેપ્યુટી સુપરિન્ટેન્ડન્ટ ઑફ‍ પોલીસ (ડીએસપી)ના પદે નિયુક્ત કરવામાં આવી છે. આસામના તેના ઢિંગ નામના ગામને લીધે ‘ઢિંગ એક્સપ્રેસ’ના નામે ઓળખાતી હિમા દાસની આ નિયુક્તિ બદલ મુખ્ય પ્રધાને ટ્વીટ કરીને જાહેરાત કરી હતી. કેન્દ્રીય ખેલપ્રધાન કિરેન રિજિજુએ પણ હિમાની આ સફળતા પર તેને શુભેચ્છા પાઠવી હતી અને સોનોવાલનો આભાર માન્યો હતો.

આ બહુમાન બદલ આભાર વ્યક્ત કરતાં ૨૦૧૮માં અર્જુન અવૉર્ડવિજેતા હિમાએ કહ્યું હતું કે ‘હું આસામ પોલીસમાં ડીએસપી તરીકેની મારી નિમણૂક કરવા બદલ કિરેન રિજિજુ સર અને સર્બાનંદ સોનોવાલ સરનો આભાર માનું છું. મારા માટે આ ઘણી પ્રેરણાત્મક વાત છે. હું મારા રાજ્ય અને દેશની સેવા કરવા તૈયાર છું. જય હિન્દ.’

હિમા દાસ હાલ ટોક્યો ઑલિમ્પિક્સમાં ક્વૉલિફાય કરવાના લક્ષ્યથી એનઆઇએસ-પટિયાલા ખાતે તનતોડ મહેનત કરી રહી છે. હિમાની ડીએસપી તરીકેની નિમણૂક બાદ કેન્દ્રીય ખેલપ્રધાને સ્પષ્ટતા કરી હતી કે હિમા ડીએસપીના પદે રહેવાની સાથે પોતાની રનિંગ યથાવત્ રાખી શકશે.

આઇએએએફ વર્લ્ડ અન્ડર-૨૦ ચૅમ્પિયનશિપમાં ગોલ્ડ મેડલ જીતનાર હિમા ભારતની પહેલી મહિલા રનર છે.

હિમાની કહાની પણ જબરી દિલચસ્પ છે. આસામના એક નાનકડા ગામમાં એક ગરીબ ખેડૂત પરિવારમાં જન્મેલી હિમા એક સમયે શૂઝ ખરીદવાનું વિચારી પણ શકતી નહોતી. હિમા નાનપણમાં ખેતરમાં પિતા સાથે ફુરસદના સમયે ફુટબૉલ રમતી હતી અને સ્કૂલના પીટીના ટીચરે તેને જોઈને રનર બનવાની સલાહ આપી હતી.

Loading...
 
 
This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK