બ્લાસ્ટમાં અફઘાનિસ્તાની ફૂટબૉલરના ચાર કઝિનનાં મૃત્યુ

નવી દિલ્હી : અફઘાનિસ્તાનના કાબુલ શહેરમાં મંગળવારે થયેલા બ્લાસ્ટમાં જે ૫૦ કરતાં પણ વધુ લોકોના મૃત્યુ થયા હતા એમાંની ચાર વ્યક્તિઓ દિલ્હીની સાફ (સાઉથ એશિયન ફૂટબૉલ ફેડરેશન) ચૅમ્પિયનશિપમાં ભાગ લેનાર અફઘાનિસ્તાની ટીમના એક પ્લેયરના સંબંધમાં હતી.

મુસ્તફા મદાર નામના આ પ્લેયરે બ્લાસ્ટમાં ચાર કઝિનને ગુમાવ્યા છે. ગઈ કાલે અફઘાનિસ્તાનની ટીમે ભુતાનને ૮-૧થી હરાવીને સેમી ફાઇનલમાં પ્રવેશ કર્યો હતો. મુસ્તફાને એ મૅચમાં નહોતું રમવા મળ્યું એટલે તે મેદાન બહારની બેન્ચ પર બેઠો હતો અને બ્લાસ્ટમાં પોતાના ચાર કઝિનના મોત થયા હોવાની જાણ થતાં તે ખૂબ ઉદાસ હતો. જોકે અફઘાનિસ્તાન વતી જે ૮ ગોલ થયા હતા એમાંના દરેક ગોલ પછી ગોલ કરનાર પ્લેયર મુસ્તફાને જઈને ભેટ્યો હતો અને તેને દિલાસો આપ્યો હતો. ટીમના કોચે આ જીત બૉમ્બહુમલામાં મૃત્યુ પામેલા લોકોને અર્પણ કરી હતી.