ભારતની વાઇસ કૅપ્ટન સ્મૃતિ મંધાના મહિલાઓની વન-ડેના આઇસીસી રૅન્કિંગ્સમાં ટૉપ-ટેનમાં પહોંચેલી એકમાત્ર ભારતીય છે.
સ્મૃતિ મંધાના
વન-ડે બૅટિંગના ટૉપ-ટેનમાં મંધાના એકમાત્ર ભારતીય
ભારતની વાઇસ કૅપ્ટન સ્મૃતિ મંધાના મહિલાઓની વન-ડેના આઇસીસી રૅન્કિંગ્સમાં ટૉપ-ટેનમાં પહોંચેલી એકમાત્ર ભારતીય છે. તે આઠમા નંબરે આવી ગઈ છે. તેણે સોમવારે શ્રીલંકા સામેની વન-ડેમાં ૮૩ બૉલમાં ૯૪ રન ફટકાર્યા હતા. આ લિસ્ટમાં ઑસ્ટ્રેલિયાની અલીસા હિલી પહેલા નંબરે અને ઇંગ્લૅન્ડની નૅટલી શિવર ત્રીજા સ્થાને છે. ભારતને શ્રીલંકા સામેની વન-ડે સિરીઝમાં ૨-૦થી સરસાઈ અપાવવામાં મોટી ભૂમિકા ભજવનાર ઑલરાઉન્ડર દીપ્તિ શર્મા અને ઓપનર શફાલી વર્માના રૅન્કિંગમાં પણ ઘણો સુધારો થયો છે.
ADVERTISEMENT
રિચર્ડ્સને પ્રતિષ્ઠિત કૅરિબિયન અવૉર્ડ
૧૯૭૪થી ૧૯૯૧ દરમ્યાન વેસ્ટ ઇન્ડીઝ વતી ૧૨૧ ટેસ્ટ અને ૧૮૭ વન-ડેમાં કુલ ૩૫ સેન્ચુરી સહિત ૧૫,૦૦૦થી વધુ રન બનાવનાર સર વિવિયન રિચર્ડ્સ વેસ્ટ ઇન્ડીઝના ‘ઑર્ડર ઑફ ધ કૅરિબિયન કમ્યુનિટી (કૅરિકૉમ) નામના પ્રતિષ્ઠિત પુરસ્કારથી સન્માનિત કરાયા છે. તેમને રવિવારે સાંજે સુરિનામમાં ૪૩મી કૉન્ફરન્સ ઑફ હેડ્સ ઑફ ગવર્નમેન્ટમાં આ અવૉર્ડ એનાયત કરાયો હતો. રિચર્ડ્સે ઈશ્વરની ભેટ સમાન ક્રિકેટ-ટૅલન્ટથી, મનોબળ અને શારીરિક સુસજ્જતાથી તેમ જ ક્રિકેટ બૅટથી વિશ્વભરમાં વેસ્ટ ઇન્ડીઝને અપ્રતિમ ગૌરવ અપાવ્યું એ બદલ તેમનું આ સન્માન કરાયું છે.
ન્યુ ઝીલૅન્ડમાં મહિલા ક્રિકેટરોને પુરુષો જેટલી જ ફી
ન્યુ ઝીલૅન્ડ ક્રિકેટ બોર્ડે જાહેર કર્યું છે કે દેશમાં પ્રોફેશનલ મહિલા ક્રિકેટરોને રમવા બદલ પુરુષ ખેલાડીઓ જેટલી જ ફી એક જ દિવસે આપવામાં આવશે. મહિલા ક્રિકેટરોમાં સૌથી ઊંચા રૅન્કની પ્લેયર્સને વર્ષે હવે ૮૩,૪૩૨ ન્યુ ઝીલૅન્ડ ડૉલરથી વધારીને ૧,૬૩,૨૪૬ ડૉલર મળશે. એ જ પ્રમાણે ઉદાહરણ તરીકે નવમી રૅન્કની ખેલાડીઓને વર્ષે ૬૬,૨૬૬ ડૉલરને બદલે હવે ૧,૪૮,૯૪૬ ડૉલર મળશે.