અમોલના કોચિંગમાં મુંબઈનો મુકાબલો મૂળ મુંબઈના જ પંડિતના કોચિંગવાળી મધ્ય પ્રદેશની ટીમ સામે
Ranji Trophy
પ્રતીકાત્મક તસવીર
બૅન્ગલોરમાં રવિવારે મેઘરાજાએ ભારત અને સાઉથ આફ્રિકાની ફાઇનલ મૅચની મજા સાવ બગાડી નાખી હતી અને હવે આવતી કાલે આ જ શહેરના ચિન્નાસ્વામી સ્ટેડિયમમાં પાંચ-દિવસીય રણજી ટ્રોફી ફાઇનલ શરૂ થશે અને એમાં પૃથ્વી શૉની મુંબઈની ટીમ આદિત્ય શ્રીવાસ્તવની મધ્ય પ્રદેશની ટીમ સામે મુકાબલામાં તો ઊતરશે જ, પરંતુ વધુ રસપ્રદ વાત એ છે કે બન્ને હરીફ ટીમના કોચ જેઓ મૂળ મુંબઈ વતી રમી ચૂક્યા છે તેમના કોચિંગની આકરી કસોટી થશે.
મુંબઈ ૪૧ વખત રણજી ચૅમ્પિયન બન્યું છે અને એની આ ૪૭મી ફાઇનલ છે. અમોલ એક સમયે મુંબઈની ટીમનો સુપરસ્ટાર બૅટર હતો અને હવે કોચ છે. મધ્ય પ્રદેશના કોચ ચંદ્રકાન્ત પંડિત પણ મુંબઈ વતી રમી ચૂક્યા છે, પરંતુ કરીઅરના અંતે મધ્ય પ્રદેશ વતી રમ્યા બાદ એના જ કોચ બન્યા હતા. બન્ને કોચ મૂળ તો લેજન્ડરી-કોચ રમાકાન્ત આચરેકરના શિષ્ય છે.
ADVERTISEMENT
બૅન્ગલોરનું આ એ જ ગ્રાઉન્ડ છે જ્યાં પંડિતની કૅપ્ટન્સીમાં મધ્ય પ્રદેશની ટીમ ૨૩ વર્ષ પહેલાં કર્ણાટક સામે રણજી ફાઇનલ હારી ગઈ હતી અને હવે પંડિતના કોચિંગમાં આ ટીમ મુંબઈ સામે આવતી કાલથી ફાઇનલ રમવાની છે.