નાગદેવી બજારના વેપારીભાઈઓ વચ્ચે વિદ્યાવિહારના ફાતિમા ગ્રાઉન્ડ પર એન.એસ.જી.ના બૅનર હેઠળ રમાતી ટી૨૦ ટુર્નામેન્ટના લીગ રાઉન્ડમાં મંગળવારની પહેલી મૅચમાં ટીયુવીએક્સ તૂફાની (૨૦ ઓવરમાં ૧૮૨/૫)નો એચએમએસ હાર્ડ હિટર્સ (૨૦ ઓવરમાં ૧૩૦/૧૦) સામે બાવન રનથી વિજય થયો
પ્રતીકાત્મક તસવીર
નાગદેવી બજારના વેપારીભાઈઓ વચ્ચે વિદ્યાવિહારના ફાતિમા ગ્રાઉન્ડ પર એન.એસ.જી.ના બૅનર હેઠળ રમાતી ટી૨૦ ટુર્નામેન્ટના લીગ રાઉન્ડમાં મંગળવારની પહેલી મૅચમાં ટીયુવીએક્સ તૂફાની (૨૦ ઓવરમાં ૧૮૨/૫)નો એચએમએસ હાર્ડ હિટર્સ (૨૦ ઓવરમાં ૧૩૦/૧૦) સામે બાવન રનથી વિજય થયો હતો. ટીયુવીએક્સના વત્સલ દોશી (૪૬ રન, ૨૬ બૉલ, ૧ સિક્સર, ૮ ફોર)ને મૅન ઑફ ધ મૅચનો અવૉર્ડ મળ્યો હતો. વિજેતા ટીમના કેનીલ શાહે સૌથી વધુ ૩ વિકેટ તથા દીપકે બે વિકેટ લીધી હતી. બીજી મૅચ વધુ રસાકસીભરી હતી. એક ઇનિંગ્સમાં ટીમના ૧૨ પ્લેયર બૅટિંગ કરી શકે અને ૧૧ ખેલાડીએ ફીલ્ડિંગ કરવાની હોય એવા સ્પર્ધાના નિયમને અનુસરીને રમાયેલી આ મૅચમાં એચઈ વૉરિયર્સ ઇલેવન (૨૦ ઓવરમાં ૧૩૫/૭) પછી ડીપીએક્સ ડાયનામાઇટ્સ (૧૯.૩ ઓવરમાં ૧૩૫/૧૧ ઑલઆઉટ), બન્ને ટીમના એકસરખા રન થતાં મૅચ ટાઇ થઈ હતી. સુપરઓવરમાં ડીપીએક્સ (૧ ઓવરમાં ૧૪/૧)નો એચઈ (૦.૪ ઓવરમાં ૫/૨) સામે વિજય થયો હતો. ડીપીએક્સના વિપુલ સંઘવી (૪૩ રન, ૩૫ બૉલ, ૩ ફોર તેમ જ બે વિકેટ)ને મૅન ઑફ ધ મૅચનો પુરસ્કાર અપાયો હતો.
આજે સવારે ૯.૩૦ વાગ્યાથી પ્રથમ સેમી ફાઇનલ કેકેઈ સ્મૅશર્સ અને ટીયુવીએક્સ તૂફાની વચ્ચે છે.
ત્યાર પછી બીજી સેમીમાં વિપ્સા વૉરિયર્સ અને એચઈ વૉરિયર્સ વચ્ચે મુકાબલો થશે.
