પોસ્ટ ગાયબ થઈ, કૅપ્ટનને કહ્યું પણ નહીં
ટીમ ઇન્ડિયા હાલમાં ન્યુ ઝીલૅન્ડ સામેની ટેસ્ટ સિરીઝ રમવાની તૈયારી કરી રહી છે ત્યારે વિરાટ કોહલીને જબરદસ્ત ઝાટકો લાગ્યો છે. ઇન્ડિયન પ્રીમિયર લીગ (આઇપીએલ)ની ટીમ રૉયલ ચૅલેન્જર્સ બૅન્ગલોરના તમામ સોશ્યલ મીડિયામાંથી પ્રોફાઇલ પિક્ચર અને પોસ્ટ હટી ગઈ હતી જેને લીધે પ્લેયરો પણ મૂંઝવણમાં હતા. આરસીબીને લીડ કરી રહેલા કોહલીને પણ આ વાતનું આશ્ચર્ય થયું છે. આરસીબીને ટૅગ કરતાં કોહલીએ કહ્યું, ‘પોસ્ટ ગાયબ અને કૅપ્ટનને કોઈએ કહ્યું પણ નથી. આરસીબી જો તમને કોઈ મદદ જોઈએ તો મને કહેજો.’
કોહલી પહેલાં યુઝવેન્દ્ર ચહલે પણ આ ઘટનાને આરસીબીની ગૂગલી ગણાવી હતી, જ્યારે એ. બી. ડિવિલિયર્સ પણ આ પ્રકારની ઘટનાથી આશ્ચર્ય પામ્યો હતો. જોકે હકીકત એ છે કે રૉયલ ચૅલેન્જર્સે મુથૂત ફિનકૉર્પ લિમિટેડ સાથે ત્રણ વર્ષનો કૉન્ટ્રૅક્ટ કર્યો છે. આ ટીમનાં રંગરૂપ બદલાઈ રહ્યાં છે અને એની જાહેરાત આજે કરવામાં આવશે.