દુલીપ ટ્રોફીની ફાઇનલમાં વેસ્ટ ઝોનને સાઉથ સામે સન્માનજનક સ્કોર અપાવ્યો
Duleep Trophy
હેત પટેલ
કોઇમ્બ્તુરમાં ગઈ કાલે દુલીપ ટ્રોફીની સાઉથ ઝોન સામેની પાંચ-દિવસીય ફાઇનલના પ્રારંભિક દિવસે વેસ્ટ ઝોને બૅટિંગ પસંદ કર્યા પછી ૮ વિકેટે ૨૫૦ રન બનાવ્યા હતા. અમદાવાદનો વિકેટકીપર-બૅટર હેત પટેલ (૯૬ નૉટઆઉટ, ૧૭૮ બૉલ, એક સિક્સર, છ ફોર) ગઈ કાલનો સુપરસ્ટાર હતો. તેની સાથે જયદેવ ઉનડકટ ૩૯ રને રમી રહ્યો હતો. ટીમના બીજા મુખ્ય બૅટર્સમાંથી કોઈએ હાફ સેન્ચુરી નહોતી ફટકારી.
કૅપ્ટન અજિંક્ય રહાણે (૮), ઓપનર યશસ્વી જૈસવાલ (૧), પ્રિયાંક પંચાલ (૭) પૂરા ૧૦ રન પણ નહોતા કરી શક્યા, જ્યારે શ્રેયસ ઐયર (૩૭) અને સરફરાઝ ખાન (૩૪) લાંબી ઇનિંગ્સમાં ટીમને મોટું યોગદાન નહોતા આપી શક્યા. સાઉથ ઝોનના રવિશ્રીનિવાસન સાઈ કિશોરે ત્રણ અને બેસિલ થમ્પી તથા ચીપુરાપલ્લી સ્ટીફને બે-બે વિકેટ લીધી હતી. હેત પટેલને છેલ્લી સાત ઇનિંગ્સમાં આજે ત્રીજી સદી ફટકારવાની તક છે. તેનો આગલી ફેબ્રુઆરીથી અત્યાર સુધીની છ ઇનિંગ્સમાં સ્કોર્સ આ પ્રમાણે હતો : ૬, ૧૮૫, ૧૫૪, ૭, ૬૭ અને બે રન. ગઈ કાલે તે ૯૬ રને રમી રહ્યો હતો અને સદીથી ચાર જ ડગલાં દૂર હતો.