વન-ડેના ટીમ-રૅન્કિંગ્સમાં ભારત મંગળવારની ૧૦ વિકેટવાળી જીતના આધારે પાકિસ્તાનને હટાવીને ત્રીજા નંબરે આવી ગયું છે.
બુમરાહ પાંચ ક્રમની છલાંગ મારીને બન્યો નંબર-વન બોલર
મંગળવારે ઓવલમાં ઇંગ્લૅન્ડ સામેની પ્રથમ વન-ડેમાં કરીઅર-બેસ્ટ ૧૯ રનમાં ૬ વિકેટ લેનાર ફાસ્ટ બોલર જસપ્રીત બુમરાહ વન-ડેના બોલર્સના રૅન્કિંગ્સમાં નંબર-વન થઈ ગયો છે. તે પાંચ ક્રમની છલાંગ મારીને મોખરે પહોંચ્યો છે. બુમરાહ (૭૧૮ પૉઇન્ટ) હવે ટ્રેન્ટ બોલ્ટ (૭૧૨) નંબર-ટૂ છે અને ત્યાર પછીના ત્રણ ક્રમે શાહીન શાહ આફ્રિદી (૬૮૧), જૉશ હેઝલવુડ (૬૭૯) અને મુજીબ-ઉર-રહમાન (૬૭૬) છે.
બુમરાહ વન-ડેમાં નંબર-વન બોલર બનેલો કપિલ દેવ પછીનો બીજો ભારતીય ફાસ્ટ બોલર છે. સ્પિનરો મનિન્દર સિંહ, અનિલ કુંબલે અને રવીન્દ્ર જાડેજા પણ અવ્વલ નંબરે આવી ચૂક્યા છે.
સૂર્યકુમાર યાદવ ટી૨૦ બૅટિંગ-રૅન્કિંગ્સમાં ૪૪ ક્રમનો કૂદકો મારીને કરીઅર-બેસ્ટ પાંચમા સ્થાને આવી ગયો છે. ભુવનેશ્વર કુમાર ટી૨૦ બોલર્સના ટૉપ-ટેનમાં એકમાત્ર ભારતીય છે.
