જેલના કેદી સાથે રોમૅન્ટિક રિલેશનશિપ રાખવા બદલ તેમ જ તેના ફોન-નંબરનું ટૅટૂ પોતાના પગ પર ચીતરાવવા બદલ જેલની મહિલા અધિકારીને ૧૦ મહિનાની જેલની સજા કરવામાં આવી છે
જેલની મહિલા અધિકારી
જેલના કેદી સાથે રોમૅન્ટિક રિલેશનશિપ રાખવા બદલ તેમ જ તેના ફોન-નંબરનું ટૅટૂ પોતાના પગ પર ચીતરાવવા બદલ જેલની મહિલા અધિકારીને ૧૦ મહિનાની જેલની સજા કરવામાં આવી છે. સુટોનમાં જેલની સુરક્ષાની કામગીરી સંભાળતી સ્કારલેટ ઑલ્ડ્રિચ નામની ૨૨ વર્ષની જેલની અધિકારીના તેની જેલના જૉન્સ નામના કેદી સાથે સુંવાળા સંબંધ હતા. પ્રાપ્ત માહિતી મુજબ જૉન્સ તેનો સંપર્ક કરી શકે એ માટે તેણે પોતાના આ પ્રેમીને મોબાઇલ ફોન પણ લાવી આપ્યો હતો. તપાસ દરમ્યાન કેદીના ફોનમાંથી પ્રેમપત્રો તેમ જ જેલ અધિકારીની સાથળ પર કેદીના ફોન-નંબરના ટૅટૂનો ફોટો જોવા મળ્યો હતો. પછીથી જેલ અધિકારીને તપાસી રહેલી નર્સે તેની સાથળ પર પણ કેદીના ફોન-નંબરનું ટૅટુ જોયું હતું. જેલ અધિકારીની ગેરવર્તણૂકને ધ્યાનમાં લઈને કોર્ટે તેને ૧૦ મહિનાની જેલની સજા કરતાં કહ્યું કે અધિકારીઓને તાલીમ દરમ્યાન કેદી સાથે સંબંધ વધારવાથી થતી સમસ્યાઓ વિશે માહિતગાર કરાતા હોય છે છતાં લૂંટના આ આરોપી સાથે સંબંધ ધરાવવા એ ઘણું ગેરજવાબદાર વર્તન કહેવાય અને એટલે તમને સજા કરવામાં આવે છે.
સ્કારલેટ ઑલ્ડ્રિચ સૌપ્રથમ વાર ઑગસ્ટ, ૨૦૧૯માં જેલના કેદી સાથે વાત કરતી જોવા મળી હતી. બન્ને જણ રોજ લગભગ એક કલાક વાતો કરતાં હતાં. તેના સાથી અધિકારીએ તેને આ સંબંધ આગળ વધારવા બાબત ચેતવણી પણ આપી હતી, પરંતુ તે માની નહોતી.
