ક્વૉરન્ટીનમાં ક્રીએટિવિટી
કાગળની કોથળીમાંથી બનાવ્યો ઘોડો
કોરોના રોગચાળાના આઇસોલેશન-ક્વૉરન્ટીનમાં અવનવી અને ક્રીએટિવ ઍક્ટિવિટીઝનાં ઢગલાબંધ ઉદાહરણો આપણે છેલ્લા ૧૦-૧૨ મહિનામાં જોયા-જાણ્યા છે. તાજેતરમાં ઑસ્ટ્રેલિયાના બ્રિસ્બેન શહેરમાં એક હોટેલની ક્વૉરન્ટીન ફૅસિલિટીમાં રહેતા ડેવિડ મૅરિયટ નામના એક ભાઈએ પણ આશ્ચર્ય થાય એવું હૅન્ડિક્રાફ્ટની કરામત દાખવી છે. તેમણે પખવાડિયા દરમ્યાન તેમને ડિલિવર કરવા માટે લંચ-ડિનર કે નાસ્તાના પૅકિંગ માટે વપરાયેલી કાગળની કોથળીઓનો ઘોડો બનાવ્યો છે. અલબત્ત એ ઘોડો બનાવવામાં માત્ર ત્રણ દિવસ વીત્યા હતા. ડેવિડ મૅરિયટે સોશ્યલ નેટવર્કિંગ સાઇટ ઇન્સ્ટાગ્રામ પર પોસ્ટ કરેલી તસવીરમાં કાગળના ઘોડાને ‘રસેલ’ નામ આપ્યું છે.
