૫૦ ફુટ ઊંચેથી બરફનો જંગી ટુકડો કાર પર પડ્યો છતાં દંપતી બચી ગયું

ઘટનાનો વિડિયો યુટ્યુબ પર વાઇરલ થયો છે

૫૦ ફુટ ઊંચેથી બરફનો જંગી ટુકડો કાર પર પડ્યો

રશિયામાં ઉત્તર ધ્રુવ તરફના કોલા પ્રદેશમાં ૫૦ ફુટ ઊંચેથી બરફનો જંગી ટુકડો એક કારની વિન્ડસ્ક્રીન પર પડ્યો હતો, પરંતુ કારમાં બેઠેલા દંપતીને આંચ નહોતી આવી. કૅમેરામાં ઝડપાયેલી એ ઘટનાનો વિડિયો યુટ્યુબ પર વાઇરલ થયો છે. આ વિડિયોમાં જંગી બરફ પડ્યો ત્યારે નિસ્સાન મુરાનો કારમાં બેઠેલું દંપતી બહાર કૂદી પડતું જોવા મળ્યું હતું. ડ્રાઇવરને ગિયર બદલવાનો સમય નહોતો, તેથી બરફના પ્રહાર પછી કાર રિવર્સમાં ઢોળાવ પર ઊતરતી જોવા મળી હતી.

મહિલાએ થોડી વાર બ્રેક દબાવવા અને ગિયર બદલવાના પ્રયત્નો કર્યા હતા, પરંતુ કંઈ ન થયું. તેનો પતિ આઘાતમાં સ્તબ્ધ થઈ ગયો હતો.

ADVERTISEMENT

એ દંપતી નજીકની દુકાનમાંથી થોડી ખરીદી કરીને કારમાં બેઠું ત્યાં જ આ દુર્ઘટના બની હતી. આ દુર્ઘટનામાં દંપતીની કારને નુકસાન જરૂર થયું હતું, પરંતુ તેઓ હેમખેમ રહ્યા હોવાથી તેમનો આ વિડિયો જોનારાઓએ તેમને અભિનંદન અને શુભેચ્છાઓ આપ્યાં હતાં.