આગથી બચવા ત્રીજા માળેથી બાળકોએ છલાંગ લગાવી અને પછી થયું આવું
ત્રીજા માળેથી બાળકોએ છલાંગ લગાવી
ફ્રાન્સમાં એક બિલ્ડિંગના ત્રીજા માળે આવેલા એક ફ્લૅટમાં આગ લાગી હતી, જેમાં ફસાયેલા ૩ અને ૧૦ વર્ષનાં બે બાળકોએ આગથી બચવા બારીની બહારથી કૂદકો માર્યો હતો. જોકે બિલ્ડિંગ નીચે ઊભા રહેલા બચાવ દળના લોકોએ તેમને ઝીલી લીધાં હતાં.
ફ્રાન્સના ગ્રેનોબલ શહેરમાં મંગળવારે બનેલી આ ઘટનાનો વિડિયો વાઇરલ થઈ રહ્યો છે જે બાળકોની પાડોશમાં રહેનાર વ્યક્તિએ લીધો હતો. વિડિયોમાં જે ફ્લૅટમાં આગ લાગી હતી એમાં બે બાળકો ફસાઈ ગયાં હોવાનું જાણવા મળ્યું હતું. બાળકોનાં માતા-પિતા ઘરને બહારથી લૉક કરીને ગયાં હોવાથી બાળકો બહાર નીકળી શકે એમ નહોતાં. પરિણામે બન્ને ભાઈઓએ જીવ બચાવવા બારીમાંથી ૪૦ ફુટ નીચે કૂદવું પડ્યું હતું. જોકે એ વખતે ફાયર-ફાઇટર્સની ટીમ ત્યાં મોજૂદ હતી એટલે ચાર-પાંચ જણે ભેગા મળીને બન્ને બાળકોને ઝીલી લીધાં હતાં. ઘસરકો પણ પડ્યા વિના બન્ને બાળકો આબાદ બચી ગયાં હતાં એ જોઈને લોકોએ ફાયર-ફાઇટર્સની કામગીરીને બિરદાવી હતી.
