૧૦ રાજ્યોમાં હિન્દુઓને લઘુમતીના દરજ્જાના મામલે સરકારે સ્ટૅન્ડ બદલતાં અદાલતે જણાવ્યું કે આ મામલે શું કરવું એ કેન્દ્ર સરકાર નિર્ણય કરી શકતી નથી એ વાત અમે સમજી શકતા નથી
સુપ્રિમ કોર્ટ
નવી દિલ્હી (પી.ટી.આઇ.) ઃ ૧૦ રાજ્યોમાં હિન્દુઓ લઘુમતીમાં હોવાની દલીલ કરીને રાજ્ય સ્તરે લઘુમતીઓની ઓળખ માટે ગાઇડલાઇન્સ નક્કી કરવાની માગણી કરતી અરજી પર ગઈ કાલે સુપ્રીમ કોર્ટમાં સુનાવણી થઈ હતી.
અદાલતે જણાવ્યું હતું કે રાજ્ય સ્તરે હિન્દુઓ સહિત લઘુમતીઓની ઓળખના મુદ્દે મક્કમતાની જરૂર છે. વારંવાર સ્ટૅન્ડ બદલવાથી મદદ નહીં મળે. સુપ્રીમે આ મુદ્દે રાજ્યોની સાથે ત્રણ મહિનામાં ચર્ચાવિચારણા કરવાનો આદેશ આપ્યો હતો. સુપ્રીમ કોર્ટે આમ જણાવ્યું એની પાછળનું કારણ એ છે કે કેન્દ્ર સરકારે આ મામલે એના આ પહેલાંના સ્ટૅન્ડને બદલીને અદાલતને જણાવ્યું હતું કે લઘુમતીઓને સૂચિત કરવાનો અધિકાર કેન્દ્ર સરકાર પાસે છે અને રાજ્યો અને અન્ય પક્ષકારો સાથેની ચર્ચાવિચારણા બાદ આ સંબંધમાં કોઈ પણ નિર્ણય લેવામાં આવશે.
જસ્ટિસ એસ. કે. કૌલ અને એમ. એમ. સુનદ્રેશની બેન્ચે જણાવ્યું હતું કે ‘આ મામલે શું કરવું એ કેન્દ્ર સરકાર નિર્ણય કરી શકતી નથી, એ વાત અમે સમજી શકતા નથી. આ વિચારો પહેલાં કરવા જોઈતા હતા.’
નોંધપાત્ર છે કે આ પહેલાં ૨૫ માર્ચની ઍફિડેવિટમાં લઘુમતી બાબતોના મંત્રાલયે અદાલતને જણાવ્યું હતું કે હિન્દુઓ અને અન્ય સમુદાયોને લઘુમતીનો દરજ્જો આપવો કે નહીં એના વિશેનો નિર્ણય રાજ્યો અને કેન્દ્રશાસિત પ્રદેશોએ લેવાનો છે. ઍડ્વોકેટ અશ્વિની કુમારની અરજીમાં જણાવવામાં આવ્યું હતું કે લદાખ, મિઝોરમ, લક્ષ્યદ્વીપ, કાશ્મીર, નાગાલૅન્ડ, મેઘાલય, અરુણાચલ પ્રદેશ, પંજાબ અને મણીપુરમાં હિન્દુઓ લઘુમતીઓમાં છે એટલે તેમને તેમની પસંદગીની શૈક્ષણિક સંસ્થાઓ માટે અધિકાર આપો.
