દુબઈથી આવેલા પ્રવાસીની ઝડતી લેવામાં આવતાં તેની પાસેથી એક હીરાજડિત બ્રેસલેટ અને એક આઇફોન 14 પ્રો પણ જપ્ત કરવામાં આવ્યો હતો
જોઈ લો કસ્ટમ અધિકારીઓએ જપ્ત કરેલી ૨૭ કરોડ રૂપિયાની સોનાની અને હીરાજડિત ઘડિયાળ
દિલ્હી ઍરપોર્ટ પરથી ગઈ કાલે કસ્ટમ અધિકારીઓએ હીરાજડિત સોનાની ૨૭ કરોડ રૂપિયાની એક ઘડિયાળ સહિત કુલ ૭ ઘડિયાળ જપ્ત કરી હતી. દુબઈથી આવેલા પ્રવાસીની ઝડતી લેવામાં આવતાં તેની પાસેથી એક હીરાજડિત બ્રેસલેટ અને એક આઇફોન 14 પ્રો પણ જપ્ત કરવામાં આવ્યો હતો. ડ્યુટી ચૂકવ્યા વગર જ આવી લક્ઝરી વસ્તુઓની દાણચોરી કરવાનો પ્રયાસ થયો હતો. અમેરિકાના જ્વેલર અને ઘડિયાળના નિર્માતા જેકબ ઍન્ડ કંપની દ્વારા બનાવવામાં આવેલી આ સોનાની ઘડિયાળ ૧૮ કૅરૅટ વાઇટ ગોલ્ડ સેટમાંથી બનાવવામાં આવી છે અને એમાં ૭૬ હીરા જડવામાં આવ્યા છે. ડાયલ પણ હીરાજડિત છે, જેની કિંમત ૨૭,૦૯,૨૬,૦૫૧ રૂપિયા હતી. મુસાફરની સામાનની ચકાસણી કરતાં અન્ય ૬ કાંડાઘડિયાળ પણ મળી આવી હતી, જેમાં એક પિગેટ લાઇમલાઇટ અને પાંચ રૉલેક્સનો સમાવેશ છે. પિગેટની કિંમત અંદાજે ૩૧ લાખ રૂપિયા અને રૉલેક્સની કિંમત ૧૫ લાખ રૂપિયા છે.