આ ટાવર્સ છેક ૨૦૧૭થી દેખરેખ હેઠળ નહોતા. તાજેતરમાં આ કંપનીના અધિકારીઓ કાર્યરત ન હોય એવા મોબાઇલ ફોન ટાવર્સનું સ્ટેટસ ચકાસવા ગયા ત્યારે હકીકત બહાર આવી
પ્રતીકાત્મક તસવીર
તામિલનાડુમાં વિચિત્ર ઘટના બની છે. અહીં ૬૦૦ મોબાઇલ ફોન ટાવર્સ મિસિંગ છે. આ મોબાઇલ ફોન ટાવર્સ સ્થાપનારી કંપની જીટીએલ ઇન્ફ્રાસ્ટ્રક્ચર લિમિટેડે જણાવ્યું હતું કે આ ટાવર્સ છેક ૨૦૧૭થી દેખરેખ હેઠળ નહોતા. દરમ્યાનમાં પોલીસ તપાસમાં તાજેતરમાં બહાર આવ્યું કે આ કંપનીના ૬૦૦ મોબાઇલ ફોન ટાવર્સ મિસિંગ છે.
જીટીએલ ઇન્ફ્રાસ્ટ્રક્ચર લિમિટેડનું હેડક્વૉર્ટર મુંબઈમાં છે, જ્યારે એની રીજનલ ઑફિસ ચેન્નઈમાં પુરાસાવક્કમમાં છે.
ADVERTISEMENT
આ કંપનીએ સમગ્ર ભારતમાં ૨૬,૦૦૦ જેટલા મોબાઇલ ફોન ટાવર્સ સ્થાપ્યા છે અને એનું સંચાલન કર્યું છે. માત્ર તામિલનાડુમાં જ ૬૦૦૦થી વધુ મોબાઇલ ફોન ટાવર્સ સ્થાપીને એને મેઇન્ટેઇન કરવામાં આવ્યા છે.
૨૦૧૮માં આ પ્રાઇવેટ ટાવર સર્વિસ કંપનીએ ભારે નુકસાનના કારણે એની સર્વિસ બંધ કરી દીધી હતી. એટલા માટે સમગ્ર દેશમાં અનેક જગ્યાઓએ મોબાઇલ ફોન ટાવર્સની નેટવર્ક સર્વિસ ઠપ થઈ ગઈ હતી.
તાજેતરમાં જ્યારે આ કંપનીના અધિકારીઓ કાર્યરત ન હોય એવા મોબાઇલ ફોન ટાવર્સનું સ્ટેટસ ચકાસવા માટે ગયા હતા ત્યારે તેમને એ જાણીને આઘાત લાગ્યો હતો કે ઇરોડ જિલ્લામાં એક મોબાઇલ ટાવર મિસિંગ હતો,જેના પગલે ઇરોડ જિલ્લામાં એક પોલીસ ફરિયાદ દાખલ કરવામાં આવી હતી કે જ્યાં આ ટાવર સ્થાપવામાં આવ્યો હતો. જોકે એ પછી સમગ્ર તામિલનાડુમાં કાર્યરત ન હોય એવા મોબાઇલ ફોન ટાવર્સની કન્ડિશન જાણવા માટે તપાસ કરવામાં આવતાં ખ્યાલ આવ્યો કે ૬૦૦થી વધારે ટાવર્સ મિસિંગ છે, જેના માટે કોઈ રહસ્યમય ગૅન્ગ જવાબદાર હોય એમ મનાઈ રહ્યું છે.
