આગની તેમ જ ડૂબવાની ઘટનાઓમાં બચાવ માટે ઇચ્છિત ડ્રોન મેળવવામાં નિષ્ફળ રહેતાં બચાવકાર્ય માટે ડ્રોનનો ઉપયોગ કરવાની મુંબઈ ફાયર બ્રિગેડની યોજના પર પાણી ફરી વળ્યું છે.
પ્રતીકાત્મક તસવીર
મુંબઈ : આગની તેમ જ ડૂબવાની ઘટનાઓમાં બચાવ માટે ઇચ્છિત ડ્રોન મેળવવામાં નિષ્ફળ રહેતાં બચાવકાર્ય માટે ડ્રોનનો ઉપયોગ કરવાની મુંબઈ ફાયર બ્રિગેડની યોજના પર પાણી ફરી વળ્યું છે.
ફાયર બ્રિગેડે સૌપ્રથમ ઑક્ટોબર ૨૦૨૧માં લોઅર પરેલમાં અવિઘ્ન પાર્કમાં બનેલી આગની ઘટનામાં અસરગ્રસ્તોની શોધ માટે ડ્રોનનો ઉપયોગ કર્યો હતો. ઉપરના માળ સુધી પાણીનો પાઇપ પહોંચાડવા માટે ડ્રોનનો ઉપયોગ કરી શકાય. ફાયર ફાઇટિંગ ગિયર અને છ કિલો કરતાં વધુ વજનના ઑક્સિજનના સિલિન્ડર સાથે હાઇરાઇઝ બિલ્ડિંગોના માળ ચડવા ઘણા મુશ્કેલ છે એમ જણાવતાં એક અધિકારીએ કહ્યું હતું કે ‘ઝુંપડપટ્ટી વિસ્તારમાં આગ લાગે ત્યારે ડ્રોન ઘણા ઉપયોગી સાબિત થઈ શકે છે. ઝૂંપડપટ્ટી ગીચ હોવાથી ફાયરમૅનને સામાન્ય રીતે સ્થળ પર પહોંચવામાં મુશ્કેલીઓનો સામનો કરવો પડે છે. આવાં સ્થળોએ ડ્રોનનો ઉપયોગ કરી શકાય છે.’
ચીફ ફાયર ઑફિસર હેમંત પરબે કહ્યું હતું કે ‘અમે એક એવા ડ્રોનની શોધ કરી રહ્યા છીએ જે માત્ર આગની ઘટનામાં નહીં પરંતુ ડૂબતા લોકોને બચાવવાના ઉપયોગમાં પણ આવી શકે. આ ડિવાઇસ એવું હોવું જોઈએ જે ડૂબતા માણસને બચાવવા માટે ફ્લોટેશન ઉપકરણ (તરતા રહેવામાં મદદ કરે એવું સાધન) નાખી શકે. અમે હજી પણ આવા ઉપકરણની શોધ કરી રહ્યા છીએ.’