કાકા બાળ ઠાકરેની મુલાકાતે રાજ ઠાકરે : અફવાબજારમાં ગરમાટો
ADVERTISEMENT
જોકે આ મુલાકાત રાજકીય કારણોસર નહીં પણ કાકાની તબિતયની પૂછતાછ માટે કરવામાં આવી હોવાનું એમએનએસ તરફથી જણાવવામાં આવ્યું હતું.
છેલ્લા અનેક દિવસોથી બાળ ઠાકરેની તબિયત લથડી ગઈ છે. એટલે જ તેઓ દશેરાના દિવસે દાદરના શિવાજી પાર્કમાં યોજાયેલી દશેરા રૅલીમાં પણ હાજર રહી શક્યા નહોતા અને તેમના રેકૉર્ડેડ ભાષણનો વિડિયો બતાવવામાં આવ્યો હતો જેમાં બાળ ઠાકરેએ પોતાની તબિયત સારી રહેતી ન હોવાનું કહ્યું હતું. સાથે જ ઉદ્ધવ અને આદિત્યને સંભાળી લેવાની ભાવુક વાત પણ તેમણે શિવસૈનિકોને કરી હતી. ભાષણમાં બાળ ઠાકરેની તબિયત નાજુક જણાઈ રહી હતી તેમ જ તેમને બોલવામાં પણ દમ લાગી રહ્યો હતો, જેને પગલે ગઈ કાલે રાજ ઠાકરે બપોરના પોતાના કાકાની તબિયતના ખબરઅંતર પૂછવા પહોંચી ગયા હતા. આ દરમ્યાન કાકા-ભત્રીજા વચ્ચે એક કલાક ચર્ચા ચાલી હતી. છેલ્લા એક મહિનામાં બીજી વાર રાજ ઠાકરેએ પોતાના કાકાની મુલાકાત લીધી હતી, જેને પગલે અનેક ચર્ચાઓ થઈ રહી છે. જોકે હંમેશ મુજબ બન્ને પક્ષે આ ચર્ચાઓનો છેદ ઉડાડી દેવામાં આવ્યો હતો.
એમએનએસ = મહારાષ્ટ્ર નવનિર્માણ સેના