એક જ દિવસમાં રેઇનકોટ પહેરીને ત્રણ રેલવે-સ્ટેશને ચોરી કરતા માઇનર આરોપીની પોલીસે ધરપકડ કરી
Crime News
પ્રતીકાત્મક તસવીર
મુંબઈનાં ત્રણ રેલવે-સ્ટેશન પર ગયા અઠવાડિયે એક જ દિવસમાં લાલ રંગનો રેઇનકોટ પહેરીને એક અજાણ્યા આરોપીએ સ્ટેશન પર ઊભેલી મહિલાઓની બૅગ, મોબાઇલ ચોર્યાં હોવાની ઘટના બની હતી, જેના પગલે રેલવે-પોલીસે તપાસ કરતાં આ કામ એક સગીર વયના ટીનેજરનું હોવાનું જાણવા મળ્યું હતું. તેની ધરપકડ કરીને ચોરીનું કારણ પૂછવામાં આવતાં તેણે પોલીસને જણાવ્યું હતું કે મારાં માતા-પિતા પશ્ચિમ બંગાળમાં રહે છે. તેમની પાસે જવા માટે પૈસા ન હોવાથી મેં ચોરીનો રસ્તો અપનાવ્યો હતો.
ભાંડુપ-વેસ્ટમાં લેક રોડ પર રહેતાં આરતી ઢળે કરેલી ફરિયાદ અનુસાર રોજની જેમ સાંજના આઠ વાગ્યે કામેથી નીકળ્યા પછી પ્રભાદેવી રેલવે-સ્ટેશન પરથી લોઅર પરેલ રેલવે-સ્ટેશન તેઓ આવ્યાં હતાં એ દરમ્યાન એક રેઇનકોટ પહેરેલો ઇસમ તેમની બાજુમાં આવ્યો હતો, જે આરતી ઢળની બૅગ જોરથી છીનવીને ત્યાંથી નાસી ગયો હતો. આ ઘટનામાં આરોપી આશરે ૩૨ હજાર રૂપિયાની માલમતા ચોરીને નાસી ગયો હતો.
ADVERTISEMENT
આવી જ બીજી ઘટનામાં માહિમ રાહેજા હૉસ્પિટલ નજીક રહેતાં અપર્ણા દેસાઈએ કરેલી ફરિયાદ અનુસાર ૩૦ જૂને સાંજના નોકરી પરથી નીકળ્યા પછી સાંતાક્રુઝ રેલવે સ્ટેશન પર તેઓ આવ્યાં હતાં. એ પછી સાંતાક્રુઝથી માહિમ આવ્યા પછી રેલવે-સ્ટેશન પર તેઓ ચાલી રહ્યાં હતાં એ દરમ્યાન એક રેઇનકોટ પહેરેલો શખસ તેમની પાસે આવ્યો હતો અને તેમનો મોબાઇલ ઝૂંટવીને નાસી ગયો હતો, જેની ફરિયાદ મુંબઈ સેન્ટ્રલ રેલવે પોલીસ-સ્ટેશનમાં કરવામાં આવી હતી.
ત્રીજી ઘટના ખાર રેલવે-સ્ટેશન પર બની હતી, જેમાં જવાહરનગરમાં રેલવે-કૉલોનીમાં રહેતાં મીના સોલંકી ૩૦ જૂને સાંજે મલાડથી ખાર રેલવે-સ્ટેશન આવ્યાં હતાં ત્યારે અજાણ્યો ઇસમ રેઇનકોટ પહેરીને તેમની પાસે આવ્યો હતો અને તેમનો મોબાઇલ ચોરીને ત્યાંથી નાસી ગયો હતો. આ ઘટનાની ફરિયાદ બાંદરા રેલવે પોલીસ-સ્ટેશનમાં નોંધાઈ હતી.
બાંદરા રેલવે પોલીસ-સ્ટેશનના તપાસ અધિકારી આર્ય દેવીદાસે ‘મિડ-ડે’ને કહ્યું હતું કે ‘રેઇનકોટ પહેરીને એક જ દિવસમાં ચાર ચોરીની ઘટના મુંબઈનાં અલગ અલગ રેલવે-સ્ટેશન પર નોંધાઈ હતી, જેમાંની એક અમારી હદમાં નોંધાઈ હતી એ જોતાં અમે ઘટનાને ગંભીરતાને લેતાં તરત સીસીટીવી કૅમેરા તપાસ્યા હતા, જેમાં એક માઇનર આરોપી દેખાઈ આવ્યો હતો એ પછી એની વધુ તપાસ કરતાં એ આરોપીની અંધેરી પોલીસે ધરપકડ કરી હોવાની ખબર પડી હતી. જોકે આરોપી ચિલ્ડ્રન્સ હોમમાંથી પણ ભાગી ગયો હતો. ચોરી કરવા પાછળનું કારણ આરોપીને પૂછતાં તેણે જણાવ્યું હતું કે તેનાં માતા-પિતા પશ્ચિમ બંગાળમાં રહે છે અને તેમની પાસે જવા માટે પૈસા ન હોવાથી ચોરી કરવાની શરૂઆત કરી હતી. આવતા દિવસોમાં કોર્ટના આદેશ પછી અમારી એક પોલીસ ટીમ આરોપીને પશ્ચિમ બંગાળ મૂકવા જશે.’