° °

આજનું ઇ-પેપર
Sunday, 22 May, 2022


મલાડમાં ધોળે દિવસે સિનિયર સિટિઝનને બાંધી, છરી બતાવીને ચલાવવામાં આવી લૂંટ

10 May, 2022 08:44 AM IST | Mumbai
Gujarati Mid-day Correspondent | feedbackgmd@mid-day.com

આ બધું ચાલતું હતું એ દરમ્યાન લૂંટ ચલાવવા આવેલા યુવાનો તિજોરી ખોલીને એમાંના આશરે ૧.૮૭ લાખ રૂપિયાના દાગીના અને રોકડ રૂપિયા લઈને નાસી ગયા હતા.’

પ્રતીકાત્મક તસવીર

પ્રતીકાત્મક તસવીર

મલાડના એસ. વી. રોડ પરની એક સોસાયટીમાં રહેતા ગુજરાતી સિનિયર સિટિઝનના ઘરે ત્રણ જણ કુરિયર-બૉય બની આવ્યા હતા. મહિલાએ જેવો ઘરનો મેઇન ડોર ખોલ્યો કે તરત એ લોકો જબરદસ્તીથી ઘરમાં ઘૂસી ગયા હતા અને ફરિયાદી મહિલાના હાથ અને મોઢું કપડા વડે બાંધી દીધાં હતાં. ત્યાર બાદ લૉકરમાં રાખેલા દાગીના લઈને નાસી ગયા હતા. આ ઘટનામાં સિનિયર સિટિઝન મહિલાને કમરમાં માર વાગ્યો છે. મલાડ પોલીસ-સ્ટેશને ફરિયાદ નોંધીને તપાસ હાથ ધરી છે.
મલાડ-વેસ્ટમાં એસ. વી. રોડ પર અલકા વિહાર હોટેલ પાસે આવેલા મારુતિ અપાર્ટમેન્ટમાં રહેતાં ૭૨ વર્ષનાં પ્રમીલા અનિલ મહેતાએ કરેલી ફરિયાદમાં જણાવ્યું હતું કે ‘શનિવારે બપોરે હું ટીવી પર ગુજરાતી સિરિયલ જોઈ રહી હતી એ દરમ્યાન અઢી વાગ્યે ઘરની બેલ વાગી હતી. દરવાજે જતાં મને એક યુવાન દેખાયો હતો. તેણે કહ્યું કે અનિલ મહેતાનું કુરિયર આવ્યું છે. દૂરથી જોતાં મને કુરિયર પર અનિલ મહેતાનું નામ દેખાયું એટલે મેં દરવાજો ખોલ્યો. દરવાજો ખોલતાની સાથે જ એકાએક ત્રણ જણ ઘરમાં ઘૂસી આવ્યા હતા. તેઓ મને મંદિરરૂમમાં લઈ ગયા હતા જ્યાં એક યુવાને મારી છાતી પર બેસીને મારા બન્ને હાથ બાંધી દીધા અને મોઢું સાડી વડે બાંધી દીધું હતું. એ વખતે આરોપી મને ગાળ આપવા માંડ્યા હતા. પછી ધારદાર છરી મારા ગળા પર મૂકીને મને ધમકી આપી હતી. એ પછી હું બચાવ માટે બોલવા ગઈ ત્યાં યુવાનોએ મને જમીન પર ઊંધી સુવડાવીને પકડી રાખી હતી. આ બધું ચાલતું હતું એ દરમ્યાન લૂંટ ચલાવવા આવેલા યુવાનો તિજોરી ખોલીને એમાંના આશરે ૧.૮૭ લાખ રૂપિયાના દાગીના અને રોકડ રૂપિયા લઈને નાસી ગયા હતા.’
પ્રમીલાબહેનના જમાઈ અમિત સરૈયાએ ‘મિડ-ડે’ને કહ્યું હતું કે ‘આરોપીઓ બધી તૈયારી સાથે આવ્યા હતા. તેમને ખબર હતી કે સોસાયટીમાં સીસીટીવી કૅમેરા અને વૉચમૅન નથી અને બપોરના સમયે બધાના દરવાજા પણ બંધ હોય છે. અત્યારે પોલીસ અમારી ફરિયાદના આધારે તપાસ કરી રહી છે.’
મલાડના સિનિયર ઇન્સ્પેક્ટર ધનંજય લિગાડેનો સંપર્ક કરવાની કોશિશ કરવા છતાં તેઓ નહોતા મળી શક્યા, જ્યારે મલાડ પોલીસ-સ્ટેશનના અન્ય એક અધિકારીએ ‘મિડ-ડે’ને કહ્યું હતું કે ‘આરોપીની શોધખોળ અમે આ બિલ્ડિંગ નીચે આવેલી હોટેલમાં લાગેલા સીસીટીવી કૅમેરા તેમ જ આ વિસ્તારમાં લાગેલા અન્ય સીસીટીવી કૅમેરાનાં ફુટેજના આધારે કરી રહ્યા છીએ. હજી સુધી અમે કોઈ આરોપીની ઓળખ કરી શક્યા નથી.’

10 May, 2022 08:44 AM IST | Mumbai | Gujarati Mid-day Correspondent

અન્ય લેખો

મુંબઈ સમાચાર

મુંબઈવાળા છે એટલે માલદાર હશે એમ માની મનસુખ સતરાનું મર્ડર

મુલુંડના ૬૦ વર્ષના કચ્છી સિનિયર સિટિઝન મનસુખ સતરાની કચ્છના વડાલા ગામથી આશરે બે કિલોમીટર દૂર રેલવે ટ્રૅકની બાજુમાંની ઝાડીઓમાંથી ક્રૂરતાથી પેટમાં વાર કરેલી ડેડ-બૉડી મળ્યાના એક મહિના બાદ તેમના જ ગામના રહેવાસીની ધરપકડ કરવામાં આવી છે.

22 May, 2022 09:18 IST | Mumbai | Priti Khuman Thakur
મુંબઈ સમાચાર

સરસ દર્શનનો આનંદ દુખમાં ફેરવાઈ ગયો

યમુનોત્રીમાં હાઇવે ધસી પડતાં મુંબઈનું ગ્રુપ બાલ-બાલ બચ્યું : દર્શન કર્યા બાદ નીચે આવતી વખતે રાતના સમયે નાનાં વાહનોમાં નીચે ઊતરતા હતા ત્યારે પથ્થર અને ઝાડ પડ્યાં : જોરદાર હવા ફૂંકાતી હોવાથી વાતાવરણ બગડતાં મુશ્કેલીમાં મુકાયા

22 May, 2022 08:53 IST | Mumbai | Prakash Bambhrolia
મુંબઈ સમાચાર

મૃત્યુનું માતમ નહીં પણ એનો ઉત્સવ

મુલુંડના ૮૧ વર્ષના દીપચંદ દોશીના મૃત્યુ પછી તેમણે કરેલાં કાર્યોને બિરદાવવા પરિવાર તરફથી ગઈ કાલે તેમની અંતિમયાત્રા બૅન્ડવાજાં સાથે કાઢવામાં આવી

22 May, 2022 08:05 IST | Mumbai | Mehul Jethva

This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK