માસ્ક ન પહેરવાનો સૌથી વધુ દંડ ત્યાંથી વસૂલાયો : જ્યાં માસ્કનો બહુ ઓછો ઉપયોગ છે એ ગોવંડીના લોકો સૌથી ઓછા દંડાયા
ફાઈલ તસવીર
મુંબઈમાં માર્ચ ૨૦૨૦માં કોરોના આવ્યા બાદ પહેલાં તો કડક લૉકડાઉન હતું અને કડક નિયંત્રણો પણ હતાં. જોકે એ પછી આર્થિંક કારણોસર એમાં ધીમે-ધીમે અનલૉકની પ્રક્રિયા હાથ ધરાઈ. જોકે એમ છતાં કોરોનાના કેસ વધતા રોકવા માટે પાલિકા તરફથી જાહેર જગ્યાએ માસ્ક પહેરવો ફરજિયાત કરાયો હતો. જોકે એમ છતાં અનેક લોકો એને યોગ્ય રીતે ફૉલો કરતા નહોતા. એથી તેમની સામે કાર્યવાહીરૂપે દંડ લેવાનું ચાલું કરાયું હતું. ગયા વર્ષથી આ વર્ષની બે ઑગસ્ટ સુધી પાલિકાના ૨૪ વૉર્ડમાં ૨૬,૪૦,૨૦૭ લોકો સામે દંડાત્મક કાર્યવાહી કરાઈ હતી અને તેમની પાસેથી કુલ ૫૩,૧૬,૮૨,૬૦૦ રૂપિયાનો દંડ વસૂલ કરાયો હતો. સૌથી વધુ કાર્યવાહી ‘કે વેસ્ટ’ વૉર્ડ (અંધેરી, પાર્લા-વેસ્ટ)માં ૨,૧૬,૪૯૪ જણની સામે કાર્યવાહી કરી ૪,૩૭,૩૨,૪૦૦ રૂપિયાનો દંડ વસૂલ કર્યો હતો, જ્યારે એ સામે ‘એમ ઈસ્ટ’ વૉર્ડ (ગોવંડી, દેવનાર, માહુલ)માં અનેક લોકો માસ્ક ન પહેરતા હોવાનું જણાયા છતાં ત્યાં સૌથી ઓછા કેસ ૩૭,૭૦૭ અને ૭૫,૪૪,૬૦૦ રૂપિયાનો દંડ વસૂલાયો હતો, જે નવાઈની વાત છે.
પોલીસ દ્વારા પણ માસ્ક ન પહેરનારાઓ સામે કાર્યવાહી કરાતી હોય છે. પોલીસે ૪,૨૦,૫૩૪ જણ સામે કાર્યવાહી કરી ૮,૪૧,૦૬,૮૦૦ રૂપિયાનો દંડ વસૂલ કરાયો હતો. રેલવે દ્વારા પણ માસ્ક ન પહેરનારાઓ સામે કાર્વાહી કરી દંડ વસૂલ કરવામાં આવતો હતો. વેસ્ટર્ન રેલવે દ્વારા અત્યાર સુધી ૧૦,૯૮૯ જણ સામે કાર્યવાહી કરી ૨૨,૬૩,૪૦૦ રૂપિયાનો દંડ વસૂલ કર્યો છે, જ્યારે સેન્ટ્રલ રેલવે અને હાર્બર રેલવેમાં અનુક્રમે ૨૧,૧૮,૨૦૦ અને ૬,૫૭,૬૦૦ રૂપિયાનો દંડ વસૂલ કરાયો હતો.
