કારની સનરૂફમાંથી ડોકિયું કરતાં દિશાંતનું ગળું પતંગના માંજાથી ચિરાઈ ગયું : પહેલી હૉસ્પિટલમાં ગયા ત્યાં ડૉક્ટરો અને પૂરતી તબીબી સુવિધા નહોતાં તથા ઍમ્બ્યુલન્સનો ડ્રાઇવર ચાવી સાથે જગ્યા પર નહોતો અને બીજી હૉસ્પિટલમાં જવા ઍમ્બ્યુલન્સ મોડી આવી
દિશાંત
દિશાંતના પિતા તેમના પૂરા પરિવાર સાથે તેમના મિત્રના પાલઘર જિલ્લાના મનોર નજીક આવેલા ફાર્મહાઉસ ગયા હતા ત્યારે રવિવારે સાંજે આઠ વર્ષનો દિશાંત કારની સનરૂફમાંથી કુદરતની ખૂબસૂરતી માણી રહ્યો હતો. એવામાં પતંગના માંજાથી ગળું ચિરાઈ જતાં તેનું મૃત્યુ થયું હતું. જોકે દિશાંતના પપ્પા પ્રસાદ તિવારી કહે છે કે પતંગના માંજાથી ગળું ચિરાયા બાદ કારમાં જ પડી ગયેલા દિશાંત માટે ઍમ્બ્યુલન્સ મળવામાં થયેલા વિલંબ તેમ જ સમયસર તબીબી સારવાર ન મળવાને કારણે દિશાંત મૃત્યુ પામ્યો હતો. ઍમ્બ્યુલન્સ પહોંચવામાં લગભગ દોઢ કલાક જેટલો સમય વીતી ગયો હતો.
પ્રસાદ તિવારીએ જણાવ્યું હતું કે ‘તે કાર ચલાવી રહ્યા હતા ત્યારે ગલતરે, હમરાપુર રોડ પર બંને તરફની લીલોતરી જોઇને દિશાંતે સનરૂફ ખોલવા કહ્યું હતું. ત્યાર બાદ માંડ ૨૦૦ મીટર ગયા હોઈશું ત્યારે અચાનક માંજાથી ગળું ચિરાઈ જતાં દિશાંત ગાડીમાં પડી ગયો હતો.’
