ચારેય જણ એક જ ઘરમાં રહે છે
ટ્વિન્સ બહેનો જોડિયા ભાઈઓને પરણી
અમેરિકાના વર્જિનિયામાં બ્રિટની ડિયેન અને બ્રિયાના ડિયેન જોડિયા હમશકલ બહેનો છે. એ બહેનો જોડિયા હમશકલ ભાઈઓ જોશ સ્લેયર્સ અને જેરેમી સ્લેયર્સને પરણી છે. બન્ને દંપતીની ઉંમર ૩૩ વર્ષની આસપાસ છે. ચારેય જણ એક જ ઘરમાં રહે છે. ગયા વર્ષે બ્રિટની અને બ્રિયાના બન્ને ગર્ભવતી થઈ હતી. જોકે બન્નેની ઇચ્છા એક જ દિવસે ગર્ભધાન થાય અને એક જ દિવસે સંતાનનો જન્મ થાય એવી હતી. એક જ દિવસે ટ્વિન્સ જન્મે એવું તેઓ ઇચ્છતાં હતાં, પરંતુ એવું ન બન્યું. હા, બેમાંથી એકના ગુડ ન્યુઝ જરૂર આવ્યા છે.
તાજેતરમાં જ બ્રિટનીએ તંદુરસ્ત બાળકને જન્મ આપ્યો છે. ગયા વર્ષે અમેરિકાના ઓહાયો સ્ટેટના ટ્વિન્સબર્ગમાં વર્ષ ૨૦૧૮ના ટ્વિન્સ ડે ફેસ્ટિવલમાં બ્રિટની ડિયેન અને બ્રિયાના ડિયેને જોશ સ્લેયર્સ અને જેરેમી સ્લેયર્સ જોડે લગ્ન કર્યાં હતાં. તાજેતરમાં સોશ્યલ મીડિયા પર પોસ્ટ કરેલા કૉલાજ પિક્ચરમાં બ્રિટની બાળક જોડે અને બ્રિયાના બેબી બમ્પ સાથે છે.