ગુજરાતમાં ફરી પાછો વરસાદ શરૂ થયો છે
ફાઇલ તસવીર
ગુજરાતમાં ફરી પાછો વરસાદ શરૂ થયો છે. ગઈ કાલે સાબરકાંઠાના વડાલી તાલુકામાં ચાર ઇંચ વરસાદ પડ્યો હતો, જેમાં સાંજે ૪થી ૬ વાગ્યા વચ્ચેના બે કલાકમાં ત્રણ ઇંચ વરસાદ પડ્યો હતો. આ ઉપરાંત કપડવંજમાં ત્રણ ઇંચ તેમ જ વડગામ, ધનસુરા અને સાવરકુંડલામાં બે ઇંચથી વધુ વરસાદ પડ્યો હતો. આ ઉપરાંત ગુજરાતમાં આજથી ચાર દિવસ દરમ્યાન ભારેથી અતિભારે વરસાદની આગાહી હવામાન વિભાગે કરી છે.
હવામાન વિભાગે કરેલી આગાહી મુજબ જૂનાગઢ, અમરેલી, ગીર સોમનાથ, નવસારી, વલસાડમાં ૮ ઑગસ્ટે ભારેથી અતિભારે વરસાદની સંભાવના છે, જ્યારે ચાર દિવસ દરમ્યાન આણંદ, છોટાઉદેપુર, વડોદરા, ભરૂચ, ભાવનગર, તાપી, સુરત, ડાંગ, રાજકોટ સહિતના જિલ્લાઓમાં વરસાદની આગાહી કરવામાં આવી છે.