મહિલાઓ પોતાના પતિને વધુ નખરા બતાવીને હેરાન ન કરે
પ્રતીકાત્મક તસવીર
દુનિયાભરમાં લૉકડાઉનના કારણે પતિ-પત્નીની વચ્ચે ઝઘડા વધી રહ્યા છે અને તેના કારણે બધા જ પરેશાન છે. મલેશિયાએ લૉકડાઉનના કારણે વધી રહેલા આ ઝઘડાઓને ઓછા કરવા માટે મહિલાઓને કેટલાક આશ્ચર્યમાં મૂકે એવા નિર્દેશ આપ્યા છે.
મલેશિયન સરકારે મહિલાઓને નિર્દેશ આપતા કહ્યું કે તેમણે રસોડું અને તમામ રૂમની રોજ સાફ-સફાઈ કરવી જોઈએ. તેનાથી ક્વૉરન્ટીન દરમ્યાન મગજને સ્વચ્છ રાખવામાં મદદ મળે છે. મલેશિયાના મહિલા મંત્રાલયે ફેસબુક પર અનેક પોસ્ટના માધ્યમથી લૉકડાઉન દરમ્યાન પત્નીઓને કેવો વ્યવહાર કરવો જોઈએ તેના દિશા-નિર્દેશ આપ્યા છે. એક તસવીરમાં દંપતીને એક સાથે કપડાં સૂકવતાં દર્શાવવામાં આવ્યું છે. તેમાં લખ્યું છે કે મહેરબાની કરી મહિલાઓ નખરા બતાવીને પોતાના પતિઓને હેરાન ન કરે. બીજી પોસ્ટમાં મહિલાઓને નિર્દેશ આપવામાં આવ્યા છે કે તેમને કાર્ટૂન કેરેક્ટર ડોરેમૉનનો અવાજ કાઢવો જોઈએ. આ એક કાર્ટૂન કેરેક્ટર છે જે સમગ્ર એશિયામાં ખૂબ લોકપ્રિય છે.
