વસઈ-વિરારના યુવાનો લોકોને ડેન્ગી વિશે શિક્ષિત કરી રહ્યા છે

Published: 13th December, 2012 06:36 IST

આ મામલે સુધરાઈ ખાસ કંઈ ન કરતી હોવાથી આ જીવલેણ રોગથી બચાવવા યંગ જનરેશનની અનોખી પહલ



પ્રીતિ ખુમાણ

વસઈ-વિરારમાં ડેન્ગીનું પ્રમાણ ખૂબ વધવા લાગ્યું છે. અવારનવાર ઘણા કેસ બહાર આવતા હોવા છતાં વસઈ-વિરાર મહાનગરપાલિકા આ વાતને ગંભીરતાથી લેતી ન હોવાથી વસઈ-વિરારના યુવાનોએ ભેગા મળીને ઝુંબેશ શરૂ કરી છે અને તેઓ ડેન્ગી વિશે લોકોને સુશિક્ષત કરી રહ્યા છે.

વિરારમાં આવેલી સંજીવની હૉસ્ટિપલમાં એક મહિનામાં ડેન્ગીના ૩૨ કેસ આવ્યા હોવાની જાણ વસઈ-વિરાર મહાનગરપાલિકાને કરવામાં આવી હતી તેમ જ તાજેતરમાં ડેન્ગીના ચાર નવા કેસ આવ્યા છે. બ્લડની તપાસ દરમ્યાન ડેન્ગીના દરદીઓ વધતા હોવાની જાણ હૉસ્પિટલે મહાનગરપાલિકાને કરી હતી, પણ એમ છતાં એ કોઈ ધ્યાન આપી નથી રહી. સંજીવની હૉસ્પિટલના મૅનેજમેન્ટે મહાનગરપાલિકાને વારંવાર સૂચિત કર્યું છે કે અમારી પાસે જેટલા કેસ આવ્યા છે એની તપાસ કર્યા પછી એ પાકા ડેન્ગીના જ કેસ છે એ સાબિત થયું છે, પણ મહાનગરપાલિકા આ વિષયને ગંભીરતાથી લઈ નથી રહી. ઊલટાનું અમે શહેરમાં દવાનો છંટકાવ કરી રહ્યા છીએ એમ કહીને એ આખા વિષયથી હાથ ઉપર કરી રહી છે.

વસઈ-વિરાર મહાનગરપાલિકા આ વિષય પર ગંભીરતા ન બતાવતી હોવાથી ત્રીસેક આગળ આવીને લોકોને ડેન્ગીથી બચવા કેવી સાવધાની રાખવી એ વિશે સુશિક્ષિત કરી રહ્યા છે. તેઓ દરેક વિસ્તારમાં જઈને લોકોને શું કરવું અને શું ન કરવું એની માહિતી પૂરી પાડી રહ્યા છે. એ સાથે સોશ્યલ નેટવર્કિંગ સાઇટ ફેસબુક પણ માહિતી આપી લોકોને સતર્ક કરી રહ્યા છે.

આ વિશે વધુ માહિતી આપતાં કૅમ્પેનના ચીફ મિક્કી આનંદે કહ્યું હતું કે ‘ડેન્ગી સે મુઝે બચાઓ’ એવું નામ અમે કૅમ્પેનને આપ્યું છે. આ કૅમ્પેનમાં વધુ ને વધુ યુવાનો જોડાઈ રહ્યા છે. મહાનગરપાલિકા આ વિષયને ગંભીરતાથી ન લેતી હોવાથી અમે યુવાનો એક થઈને આ કૅમ્પેન કરી રહ્યા છીએ. મહાનગરપાલિકા અમારા આ કામમાં અમને મદદ કરવા પણ તૈયાર નથી તેથી અમે ફેસબુક દ્વારા લોકોને મદદ કરવા વિનંતી પણ કરી છે. અમે લોકોના ઘરે-ઘરે જઈને ડેન્ગી શું છે, કેવી રીતે થાય છે, એનાથી કેવી રીતે બચવું જેવી બધી માહિતી તેમને આપી રહ્યા છીએ.’

Loading...
 
 
This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK