આ બહેન કોરોના વાઇરસના ડરથી જિરાફ બની ઘૂમે છે
ચીનમાં પેદા થયેલા કોરોના વાઇરસની ઝપટમાં લગભગ આખું વિશ્વ આવી ગયું છે. કોરોના વાઇરસનો ચેપ ન લાગે એ માટે લોકો શક્ય તમામ પ્રયાસો કરી રહ્યા છે પછી ભલેને આ પ્રયાસમાં તેઓ બેહૂદા કે ભદ્દા દેખાય.
ચીનમાં મીસ હી નામે ઓળખાયેલી એક મહિલાનો વિડિયો વાઇરલ થયો છે, જેમાં તે ચીનના સીચુઆન પ્રાંતમાં આવેલા લુઝોઉમાં એક હૉસ્પિટલની મુલાકાતે ગઈ હતી. જોકે તેની મુલાકાતમાં અસામાન્ય તેનો ડ્રેસ હતો. કોરોના વાઇરસનો ચેપ ન લાગે એટલે જાયન્ટ જિરાફનો વેશ પહેર્યો હતો.
ADVERTISEMENT
ચીની વિડિયો પ્લૅટફૉર્મ પર પોસ્ટ કરાયેલી ટચૂકડી વિડિયો ક્લિપમાં આ મહિલા બ્રાઉન કલરના પ્લાસ્ટિક કૉસ્ચ્યુમમાં હૉસ્પિટલમાં દાખલ થાય છે, કૉસ્ચ્યુમમાં નાની ક્લિયર પ્લાસ્ટિક ફિલ્મમાંથી માત્ર તેની આંખો જોઈ શકાય છે.
તેના આવા કૉસ્ચ્યુમ માટે તેણે જણાવ્યું કે કોરોના વાઇરસનો ચેપ ફેલાતાં પહેલાં શ્વાસની તકલીફ માટે હૉસ્પિટલમાં દાખલ કરાયેલા તેના પિતાને મળવા તે આવી હતી. હૉસ્પિટલની પૉલિસી પ્રમાણે તેના ચેકિંગ માટે પણ તેણે કૉસ્ચ્યુમ ન હટાવતાં વેબ-કૅમથી વર્ચ્યુઅલ ચેકિંગનો આગ્રહ રાખ્યો હતો.