સંસદના બજેટ સત્ર પૂર્વે સરકારે સર્વપક્ષી બેઠક યોજશે

કેન્દ્ર સરકારે સંસદના બજેટ સત્ર પૂર્વે આગામી ૩૦ જાન્યુઆરીએ સર્વપક્ષીય બેઠક યોજી છે. એ બેઠકમાં ૧ ફેબ્રુઆરીએ બજેટની રજૂઆત વિશે ચર્ચા કરવામાં આવશે.
૩૦મીએ સવારે ૧૧.૩૦ વાગ્યે સંસદનાં બન્ને ગૃહના તમામ રાજકીય પક્ષોની બેઠક વિડિયો કૉન્ફરન્સિંગના માધ્યમથી યોજાશે. એ જ દિવસે સત્તાધારી નૅશનલ ડેમોક્રૅટિક અલાયન્સના સભ્યોની બેઠક યોજાશે. સંસદનું બજેટ સત્ર કોરોના રોગચાળા સામેની સાવચેતીનાં પગલાં સાથે બે તબક્કામાં યોજાશે. પ્રથમ તબક્કો ૩૧ જાન્યુઆરીથી ૧૫ ફેબ્રુઆરી સુધી અને બીજો તબક્કો ૮ માર્ચથી ૮ એપ્રિલ સુધી યોજાશે.
સર્વપક્ષીય બેઠક વડા પ્રધાન નરેન્દ્ર મોદીની અધ્યક્ષતામાં યોજાશે. એ બેઠકમાં સરકાર તરફથી સંરક્ષણપ્રધાન રાજનાથ સિંહ, રાજ્યસભામાં બીજેપીના નેતા થાવરચંદ ગેહલોત અને નાયબ નેતા પીયૂષ ગોયલ, સંસદીય બાબતોના પ્રધાન પ્રહલાદ જોશી, અર્જુનરામ મેઘવાલ અને વી. મુરલીધરન ઉપસ્થિત રહેશે.