કૃષિ ધારાની મોકૂફીના સરકારના પ્રસ્તાવને ખેડૂતોએ ફગાવ્યો

નવા કૃષિ કાયદાને લઈને આંદોલનકારી ખેડૂતો અને સરકાર વચ્ચેની મડાગાંઠ ઉકેલવાનું નામ જ નથી લેતી. બુધવારે કૃષિ કાયદાને દોઢ વર્ષ માટે મોકૂફ રાખવાનો પ્રસ્તાવ સરકારે ૧૦મી બેઠક દરમ્યાન ખેડૂત આગેવાનો સમક્ષ મૂક્યો હતો, જે મુજબ હાલમાં કાયદો મોકૂફ રાખીને એક સમિતિ બનાવવામાં આવે જે ત્રણેય કાયદાઓ ઉપરાંત ખેડૂતોની માગણીને ધ્યાનમાં રાખીને સહમતીના આધારે ઉકેલ લાવવામાં આવે. જોકે ગઈ કાલે સંયુક્ત કિસાન મોરચાની સામાન્ય સભામાં સરકારના આ પ્રસ્તાવને પણ ફગાવી દેવામાં આવ્યો છે તેમ જ ત્રણેય કાયદાને હટાવવાની માગણી પર જ અડગ રહ્યા છે. ગઈ કાલની સભામાં આ આંદોલનને કારણે માર્યા ગયેલા ૧૪૭ ખેડૂતોને શ્રદ્ધાંજલિ આપવામાં આવી હતી.