આતંકવાદીઓ પાકિસ્તાનમાં ફરીથી એક વાર જેલ તોડશે

Published: 19th December, 2014 06:45 IST

પાકિસ્તાનના વડા પ્રધાન નવાઝ શરીફે આતંકવાદના કેસમાં ફાંસીની સજા સામેના પ્રતિબંધને ઉઠાવી લેતાં દેશના ખૈબર-પખ્તુનખ્વા પ્રાંતના કેદીઓ જેલ તોડવાનો પ્રયાસ કરશે એવો ભય સેવાઈ રહ્યો છે અને પાકિસ્તાની સત્તાવાળાઓએ આ વિશે અલર્ટ જાહેર કરી છે. ખૈબર-પખ્તુનખ્વા પ્રાંતની સરકારે ઇન્સ્પેક્ટર જનરલ ઑફ પ્રિઝન્સને બુધવારે આ અલર્ટ ઇશ્યુ કરી હતી.


આતંકવાદના કેસોમાં ફાંસીની સજા પામેલા કેટલાક કેદીઓ હરિપુર તથા પેશાવરની જેલમાં છે, જ્યારે ઘણા હાઈ-પ્રોફાઇલ આતંકવાદીઓને કોહટ, તિમરગારા, બન્નુ, ડેરા ઇસ્માઇલ ખાન અને માનશેરા જેલમાં ગોંધવામાં આવ્યા છે.

ગયા વર્ષે જુલાઈ મહિનામાં ભારે શસ્ત્રોથી સજ્જ થઈને આવેલા તાલિબાનના આતંકવાદીઓ ડેરા ઇસ્માઇલ ખાન જેલમાંથી ૩૫ હાઈ-પ્રોફાઇલ આતંકવાદીઓ સહિત કુલ ૧૭૫ કેદીઓને છોડાવી ગયા હતા. એપ્રિલ-૨૦૧૨માં બન્નુ જેલમાં ત્રાટકેલા ૧૦૦થી વધુ આતંકવાદીઓએ ૩૮૪ કેદીઓને છોડાવ્યા હતા.

પાકિસ્તાનના વળતા હુમલામાં ૫૭ આતંકવાદી ઠાર

પેશાવરની આર્મી પબ્લિક સ્કૂલ પર કરવામાં આવેલા ભયંકર હુમલાની યોજના ૧૬ તાલિબાન આતંકવાદીઓએ ડિસેમ્બર મહિનાની શરૂઆતમાં અફઘાનિસ્તાનમાં યોજાયેલી એક બેઠકમાં બનાવી હોવાનું પાકિસ્તાની અધિકારીઓએ ગઈ કાલે જણાવ્યું હતું.

મંગળવારે કરવામાં આવેલા આ હુમલામાં ૧૩૨ સ્ટુડન્ટ્સ સહિત કુલ ૧૪૮ લોકોનાં મોત થયાં હતાં અને પાકિસ્તાનના ઇતિહાસમાંનો આ સૌથી ઘાતક આતંકવાદી હુમલો છે.

બીજી તરફ પાકિસ્તાની લશ્કરે ખૈબર આદિવાસી પ્રદેશમાં બુધવારે વળતો હુમલો કરીને ૫૭ આતંકવાદીઓને ખતમ કર્યા હતા. તાલિબાન આતંકવાદીઓ ખૈબરના જે તિરાહ વેલી વિસ્તારમાં સંતાયેલા રહે છે એ વિસ્તાર પર પાકિસ્તાની લશ્કરે ૨૦ હવાઈ હુમલા કર્યા હતા.

Loading...
 
 
This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK