બીએમસીની નોટિસ સામે સોનુ સૂદે હાઈ કોર્ટમાં કરેલી અરજીની આજે સુનાવણી
સોનુ સૂદ
બૉલીવુડના અભિનેતા સોનુ સૂદને મુંબઈ મહાનગરપાલિકાએ તેના જુહુના છ માળના ઘરને પરવાનગી લીધા વિના હોટેલમાં રૂપાંતર કરવા બાબતે નોટિસ મોકલ્યા બાદ આ મામલે હાઈ કોર્ટમાં તેણે અરજી દાખલ કરી હોવાનું જાણવા મળ્યું હતું. આજે અરજીની સુનાવણી હાથ ધરાવાની શક્યતા છે. અભિનેતાના વકીલે દાવો કર્યો છે કે તેણે શક્તિ સાગર નામના મકાનમાં કોઈ પણ પ્રકારનું ગેરકાયદે બાંધકામ નથી કર્યું.
અભિનેતા સોનુ સૂદ સામે મુંબઈ મહાનગરપાલિકાએ જુહુ પોલીસ સ્ટેશનમાં ફરિયાદ નોંધાવી છે. અભિનેતાએ તેના જુહુ ખાતેના છ માળના ઘરને કોઈ પણ જાતની પરમિશન લીધા વિના હોટેલમાં ફેરવી નાખ્યું હોવાનું ધ્યાનમાં આવતાં પાલિકાએ પોલીસમાં ફરિયાદ નોંધાવીને કાર્યવાહી કરવાની માગણી કરી છે.