રેકૉર્ડબ્રેક દૂધ આપતી ભેંસ ૫૧ લાખ રૂપિયામાં વેચાઈ
વિશ્વમાં સૌથી વધુ દૂધ આપવાનો રેકૉર્ડ કરનારી હરિયાણાની મુર્રાહ નસલની ભેંસ સરસ્વતી સોમવારે ૫૧ લાખ રૂપિયામાં વેચાઈ હતી. હિસ્સાર જિલ્લાના લિતાનીના ખેડૂત સુખબીર સિંહ ઢાંડાની ભેંસ સરસ્વતીએ ૩૩.૧૩૧ લિટર દૂધ આપીને પાકિસ્તાનની ભેંસનો રેકૉર્ડ તોડ્યો હતો, જેણે ૩૨.૫૦૦ લિટર દૂધ આપ્યું હતું. આ માટે સુખબીરને બે લાખ રૂપિયાનું ઇનામ પણ મળ્યું હતું. સુખબીરને સરસ્વતી ચોરી થઈ જવાનો ભય સતાવતો હતો એટલે તેણે લુધિયાણાના પવિત્ર સિંહને આ ભેંસ વેચી દીધી હતી.
ભેંસ વેચતાં પહેલાં સુખબીર સિંહે સમારોહનું આયોજન કર્યું હતું, જેમાં તેણે ચાર વર્ષ પહેલાં બરવાળાના ખોખા ગામના ખેડૂત ગોપીરામ પાસેથી એક લાખ ત્રીસ હજાર રૂપિયામાં સરસ્વતી ખરીદી હતી. ત્યાર બાદ સરસ્વતીએ અનેક બચ્ચાંને જન્મ આપ્યો હતો. હાલમાં સરસ્વતીનું દૂધ વેચીને સુખબીર મહિને એક લાખ રૂપિયા કરતાં વધુની આવક રળે છે.