વડા પ્રધાન મોદીએ પ્રથમ ડબલ ડેકર માલગાડીને આપી લીલી ઝંડી

વડા પ્રધાન નરેન્દ્ર મોદીએ ગુરુવારે વેસ્ટર્ન ડેડિકેટેડ ફ્રેટ કૉરિડોર (ડબ્લ્યુડીએફસી)ના રેવાડી-મદાર વિભાગને દેશને સમર્પિત કર્યો હતો. આ દરમિયાન વડા પ્રધાન મોદીએ એક માલગાડી ટ્રેનને લીલી ઝંડી આપી હતી, જેની લંબાઈ ૧.૫ કિલોમીટર છે અને ડબલ કન્ટેનર વહન સિસ્ટમ ધરાવે છે. મોદીએ કહ્યું, આજે દેશની માળખાગત સુવિધાને વિશ્વસ્તર બનાવવા માટે નવી ગતિ પ્રાપ્ત થઈ છે. વડા પ્રધાને કહ્યું કે ‘૧૦-૧૨ દિવસમાં જ ૧૮,૦૦૦ કરોડ રૂપિયા ડિજિટલ ઇન્ફ્રાસ્ટ્રક્ચર દ્વારા ખેડૂતોનાં ખાતાંમાં ટ્રાન્સફર કરવામાં આવ્યા હતા, ડ્રાઇવરલેસ મેટ્રો, ઓડિશામાં આઇઆઇટી કૅમ્પસનું ઉદ્ઘાટન કરાયું હતું. દેશની ૪૫૦ કિલોમીટર લાંબી મૅન્ગલોર-કોચ્ચિ ગૅસ પાઇપલાઇનનું ઉદ્ઘાટન કરવામાં આવ્યું હતું. આજે વેસ્ટર્ન કૉરિડોર દેશને સમર્પિત કરવામાં આવ્યો છે.’