માસ્ક વગર ફરનારાઓ પાસેથી પોલીસ ઑન ધ સ્પૉટ દંડ વસૂલશે

Published: 22nd February, 2021 09:37 IST | Gujarati Mid-day Correspondent | Mumbai

મુંબઈનાં તમામ પોલીસ-સ્ટેશનોને કોવિડના નિયમોનું પાલન ન કરનારાઓ વિરુદ્ધ ઍક્શન લેવાનો આદેશ

રાજ્ય સરકાર લોકો સોશ્યલ ડિસ્ટન્સિંગ રાખે અને માસ્ક પહેરે એ માટે સખતાઈ કરી રહી છે, પણ બેફિકર મુંબઈગરાઓથી જુહુ બીચ પર ગઈ કાલે મહેરામણ ઊભરાયો હતો. (તસવીર: શાદાબ ખાન)
રાજ્ય સરકાર લોકો સોશ્યલ ડિસ્ટન્સિંગ રાખે અને માસ્ક પહેરે એ માટે સખતાઈ કરી રહી છે, પણ બેફિકર મુંબઈગરાઓથી જુહુ બીચ પર ગઈ કાલે મહેરામણ ઊભરાયો હતો. (તસવીર: શાદાબ ખાન)

મુંબઈ પાલિકાના સ્વચ્છતા રક્ષકો અને માર્શલો બાદ હવે પોલીસને પણ માસ્ક ન પહેરનારાઓ વિરુદ્ધ કાર્યવાહી કરવાની સૂચના અપાઈ હોવાનું જાણવા મળ્યું છે. મુંબઈ પોલીસના જૉઇન્ટ પોલીસ કમિશનર (લૉ ઍન્ડ ઑર્ડર) વિશ્વાસ નાંગરે પાટીલે આ બાબતનો શહેરનાં તમામ પોલીસ-સ્ટેશનોના સિનિયર ઇન્સ્પેક્ટરોને સંબોધતો ઑડિયો મેસેજ સોશ્યલ મીડિયામાં પોસ્ટ કર્યો છે. આ સાથે જ ગઈ કાલે ઑન ધ સ્પૉટ દંડ વસૂલ કરવા માટેનું નોટિફિકેશન પણ પોલીસે બહાર પાડ્યું હોવાનું જાણવા મળ્યું હતું.

મુંબઈ પોલીસના જૉઇન્ટ પોલીસ કમિશનર (લૉ ઍન્ડ ઑર્ડર) વિશ્વાસ નાંગરે પાટીલની એક ઑડિયો-ક્લિપ ગઈ કાલે સોશ્યલ મીડિયામાં વાઇરલ થઈ હતી. આ ક્લિપમાં તેઓ મુંબઈનાં તમામ પોલીસ-સ્ટેશનોના સિનિયર ઇન્સ્પેક્ટરોને સંબોધીને કહી રહ્યા છે કે કોરોનાને કન્ટ્રોલ કરવા માટે પાલિકાની સાથે હવે પોલીસને પણ માસ્ક ન પહેરનારાઓ સામે ઑન ધ સ્પૉટ ઍક્શન લેવાની છૂટ કમિશનર પરમબીર સિંહે આપી છે. આથી દરેક પોલીસ-સ્ટેશનમાં આવેલાં ગિરદી થતી હોય એવાં જાહેર સ્થળો, ચોપાટી, ગાર્ડન, બગીચા વગેરે સ્થળોએ મોટા પ્રમાણમાં કાર્યવાહી કરીને રોજેરોજનો રિપોર્ટ રજૂ કરવાનો રહેશે. જે પોલીસ-સ્ટેશનમાં માસ્કના નિયમભંગના ઓછા કેસ નોંધાશે તેમની પાસેથી ખુલાસો મગાશે, જ્યારે જે પોલીસ-સ્ટેશનમાં સારું કામ થશે એમને રિવૉર્ડ અપાશે. ડીસીપી ઑપરેશન્સ રોજેરોજ ફૉલો-અપ લેશે. આ સિવાય દરેક વિભાગના ડીસીપી અને ઍડિશનલ કમિશનર મૉનિટરિંગ કરશે. મુંબઈમાંથી કોરોનાને કાયમ માટે વિદાય આપવા માટે પાલિકાએ પોલીસને આપેલી જવાબદારીમાં બધાએ સહયોગ કરવો રહ્યો. રસપ્રદ વાત એ છે કે માસ્ક ન પહેરનારાઓની પાસેથી જે ૨૦૦ રૂપિયા દંડ પેઠે વસુલ કરવામાં આવશે એમાંથી ૧૦૦ રૂપિયા પોલીસ ફંડમાં જશે અને બાકીના સુધરાઈને મળશે.

પોલીસને પૂરી તાકાતથી કામ કરવાની સૂચના

ચેમ્બુર પોલીસ-સ્ટેશનનાં સિનિયર ઇન્સ્પેક્ટર શાલિની શર્માએ ‘મિડ-ડે’ને કહ્યું હતું કે ‘તમામ પ્રયાસ બાદ પણ લોકો કોવિડને ગંભીરતાથી નથી લેતા એટલે પાલિકાએ પોલીસની મદદથી આ જીવલેણ વાઇરસને કાબૂમાં લેવાનો નિર્ણય લીધો છે. કમિશનરસાહેબે દરેક પોલીસ-સ્ટેશનના સિનિયર ઇન્સ્પેક્ટરને પૂરી તાકાતથી કામ કરવાની સૂચના આપી છે. દરેક પોલીસ-સ્ટેશનને માસ્કના નિયમનો ભંગ કરનારા સામે કાર્યવાહી કરવાનું નોટિફિકેશન પણ જાહેર કરવામાં આવ્યું છે.’

Loading...
 
 
This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK