હેલોવીનમાં ડરાવવા માટે માલિકે પોતાના પાળેલા ડૉગીને કંકાલ જેવો લુક આપ્યો
પાળેલા ડૉગીને કંકાલ જેવો લુક આપ્યો
હેલોવીન દરમ્યાન લોકો ઘરની અંદર-બહારની સજાવટની વાત હોય કે પોતાના કૉસ્ચ્યુમ્સની, એમાં કંઈક એવો ટચ આપે છે જે સામેવાળો એ જોઈને જ ડરી જાય. કૅલિફૉર્નિયામાં રહેતી કૅટરિના શૉર્ટ નામનાં બહેન પોતે પેટ ગ્રૂમર છે. મતલબ કે પાળેલા પ્રાણીઓને નવડાવી, ધોવડાવી, નવા કપડાં, હૅરકટ દ્વારા અવનવો લુક આપવા માટેનું કામ કરે ચે. જોકે આ વખતે કૅટરિનાએ પોતાના જ પાળેલા ઝીઅસ નામના ડૉગીને હેલોવીન માટે જબરો ડરામણો લુક આપ્યો છે. એ માટે તેણે ડૉગીના ફરને ડાઈ કરીને એની પર એવો આભાસ પેદા કર્યો છે જાણે એની અંદરના હાડકાં બહાર ઊપસી આવ્યા હોય. હાડકાં જેવો લુક ઉપસાવવાનું કામ એવું હૂબહૂ થયું છે કે જોતાં જ લાગે કે ડૉગીએ કંકાલ જેવો કૉસ્ચ્યુમ પહેર્યો છે.