પતિને બહાર દારૂ પીવા જતો રોકવા પત્નીએ ઘરમાં જ પબ શરૂ કર્યું
ઘરમાં જ પબ
ઘણી વાર આખા દિવસના કામનો ભાર ઉતારવા માટે મિત્રો સાથે બેસીને એકાદ-બે પેગ શરાબ પીવાથી તાજગી વર્તાતી હોય છે, પણ જો પતિદેવ રોજ અને મોટા ભાગનો સમય દારૂ પીવાના બહાને ઘરની બહાર નીકળી જાય અથવા તો મોડા આવે ત્યારે ઘરમાં ધમાલ અચૂક થાય. જોકે આનો પણ અનોખો ઉકેલ એક સ્માર્ટ પત્નીએ શોધી કાઢ્યો છે. શરાબ પીવા માટે રોજેરોજ બહાનાં કરીને જતા ઇંગ્લૅન્ડના ડેવોન રાજ્યના ન્યુટન અબોટ વિસ્તારના એન્જિનિયર પૉલ ટેપરથી કંટાળીને તેની પત્ની જેને ઘરના વરંડામાં જ એક નાનું પબ બનાવી દીધું. ઘરના વરંડામાં પબ બનાવવાને કારણે હવે તેનો પતિ ઘરે પણ રહેવા લાગ્યો છે તેમ જ તેમને આવક પણ થવા માંડી છે.
નર્સ તરીકે કામ કરતી ત્રણ બાળકોની માતા જેન કહે છે કે ‘ઇન ધ ડૉગહાઉસ’ નામનું આ પબ શરૂ કર્યા બાદ જીવવાને નવો વળાંક મળ્યો છે. પબનો ઉપયોગ વીક-એન્ડમાં પાર્ટીઓ કરવા કરી શકાય છે અને હવે પૉલ પણ ઘરે રહીને એન્જૉય કરી શકે છે.
