બ્રોકલીમાંથી ઇયળ નીકળી, ભાઈને ગમી ગઈ એટલે એમાંથી પતંગિયું બનાવ્યું
ઈયળમાંથી બનાવ્યુ પતંગિયું
તમે ફ્લાવર કે બ્રોકલી જેવી શાકભાજી લાવો અને એમાંથી જો ઇયળ નીકળે તો શું કરો? ઇયળની સાથે જ બ્રોકલીને પણ ફેંકી દઈએ. જોકે સ્પેનમાં રહેતા સૅમ ડૉર્સલ નામના ભાઈએ બ્રોકલીમાંથી મળેલી ઇયળનું જે કર્યું એ વિશે કોઈ વિચારી પણ ન શકે. તેણે શાક બનાવવા માટે બ્રોકલી સમારી ત્યારે અંદરથી નીકળેલી કૅટરપિલરને એમ જ ફેંકી દેવાને બદલે એનું નામ પાડીને અેને ડબ્બીમાં ભરી રાખી. સૅમે એનું નામ સૅડ્રિક રાખ્યું. ઇયળવાળી બ્રોકલી તેણે સુપરમાર્કેટવાળાને બતાવી તો તેમણે એને રિપ્લેસ કરી આપી. જોકે એ જે નવી બ્રોકલીઓ આવી એમાં પણ બીજી કુલ છ ઇયળો નીકળી. હવે તો સૅમ ઇયળ કેવી રીતે પેદા થાય છે એ જોવા સમજવા માગતો હતો એટલે તેણે એ ઇયળને અલગ બૉટલમાં ભરી લીધી. એને ખાવા માટે ખૂબબધી બ્રોકલી પણ આપી. લગભગ ત્રીસ કલાક બાદ આ સાત ઇયળો મેટાપૉડ બની ગઈ અને પછી મેટાપૉડમાંથી એ પતંગિયાનું કકુન બની ગયું. આ કકુનમાંથી ધીમે-ધીમે પતંગિયું બની ગયું. સાતેય પતંગિયાઓનાં સૅમભાઈએ નામ પાડ્યાં છે અને હવે તેમના બગીચામાં એ પાળેલાં હોય એમ ફુદકે છે.