કલકત્તાના આ ટાયર પાર્કમાં ફરતાં-ફરતાં કદી ટાયર્ડ નહીં થવાય

પશ્ચિમ બંગાળના સ્ટેટ ટ્રાન્સપોર્ટ ડિપાર્ટમેન્ટે વેસ્ટમાંથી આર્ટ તૈયાર કરવાના પ્રોજેક્ટના ભાગરૂપે એક ખાસ ટાયર પાર્ક તૈયાર કર્યું છે. બસ ડેપોની બાજુમાં તૈયાર કરવામાં આવેલા આ પાર્કમાં ટ્રાન્સપાર્ટ વિભાગે કાઢી નાખેલા અને નકામા ટાયર્સને એવી રીતે સજાવીને મૂક્યા છે કે જોતાં જ મન મોહી ઊઠે.

પાર્કની દિવાલોની સજાવટમાં પણ જૂનાં ટાયર્સ વાપરેલાં છે અને સાથે અહીં આરામથી બેસી શકાય એવી ખુરશીઓ અને ટેબલ પણ ટાયરમાંથી જ બનાવવામાં આવ્યા છે. આખા શહેરના વિવિધ બસ ડૅપોમાં કચરાની જેમ પડી રહેલા વિવિધ સાઇઝનાં ટાયર્સનો જ ઉપયોગ કરવામાં આવ્યો છે. ટાયરનું રંગકામ એવી રીતે કરવામાં આવ્યું છે કે બાળકોને ખરેખર એ જોવાની મજા પડી જાય.