તમારા ટબૂરિયા માટે લક્ઝરી ઇલેક્ટ્રિક કાર આવી ગઈ છે, કિંમત 26.21 લાખ
લક્ઝરી ઇલેક્ટ્રિક કાર
લક્ઝરી કાર મેકર કંપની બુગાટીએ બાળકો માટે ૫૦૦ મિનિએચર ઇલેક્ટ્રિક ટૉય કાર બનાવી છે. એ રમકડાની કારની કિંમત ૩૫,૦૦૦ ડૉલર (અંદાજે ૨૬.૨૧ લાખ રૂપિયા) નક્કી કરવામાં આવી છે. ફ્રાન્સની કાર-મેકર કંપનીએ લંડનની લિટલ કાર કંપની સાથે મળીને બાળકો માટેની નાનકડી ઇલેક્ટ્રિક ટૉય કાર બુગાટી બેબી-2 2019નું મૉડલ જીનિવા મોટર શોમાં લૉન્ચ કર્યું હતું. ત્યાર પછી ટૂંક સમયમાં એવી ૫૦૦ કાર વેચાઈ ગઈ હતી. એ બધી કાર વેચાઈ ગયા પછી કોરોનાનો રોગચાળો ફાટી નીકળ્યો. એ સંજોગોમાં સંતાનો માટે મોંઘીદાટ ટૉય કાર ખરીદનાર માતા-પિતાને એવું લાગ્યું કે એ ખરીદી બિનજરૂરી છે. એથી તેમણે જાહેરાત કરી કે બુગાટી બેબી-2 ઇલેક્ટ્રિક ટૉય કાર ફરી વેચાણ માટે ઉપલબ્ધ છે. એ ટૉય કાર ઓરિજિનલ બુગાટી ટાઇપ-35 રેસિંગ કારની પ્રતિકૃતિ સમાન છે. કંપનીના મૂળ માલિક એત્તોર બુગાટીએ લગભગ ૧૦૦ વર્ષ પહેલાં તેમના પોતાના સંતાન માટે આવી ટૉય કાર બનાવવાનો ઇરાદો રાખ્યો હતો. એ ઇરાદાનો સિલસિલો આજ સુધી ચાલે છે. ૨૦૧૯માં માલિકોએ તેમનાં બધા સંતાનો માટે એ ટૉય કાર બનાવવાની ઇચ્છા રાખતાં કુલ ૫૦૦ કારના ઉત્પાદનનો નિર્ણય લીધો હતો. બુગાટી બેબી-2 ઇલેક્ટ્રિક ટૉય કાર કલાકના ૧૨ કિલોમીટરની ઝડપે દોડાવી શકાય છે. જો કોઈ નિષ્ણાત વ્યક્તિ હોય તો એ કારને કલાકના ૩૦ કિલોમીટરની ઝડપે દોડાવી શકે છે. એ કારની વધુ મોંઘી આવૃત્તિ પણ છે. એ ટૉય કારના વિત્તેસ્સી મૉડલની કિંમત ૫૦,૦૦૦ ડોલર (અંદાજે ૩૭.૪૪ લાખ રૂપિયા) અને પુર સેન્ગ મૉડલની કિંમત ૬૮,૦૦૦ ડૉલર (અંદાજે ૫૦.૯૨ લાખ રૂપિયા) નક્કી કરવામાં આવી છે.