કભી ખુશી કભી ગમનું બોલે ચૂડિયાં, ગીત એક્ઝૅક્ટ એવી જ રીતે આ કલાકારોએ રીક્રીએટ કર્યું

આપણા બૉલીવુડની ફિલ્મોના ચાહકો માત્ર ભારતમાં જ નહીં, દેશ-વિદેશમાં છે. ઇન્ડોનેશિયામાં આવેલા આવા જ એક બૉલીવુડ ફૅન્સના ગ્રુપે એવો કારનામો કર્યો છે જે કદાચ ભારતમાં પણ કોઈ બૉલીવુડ ચાહકે નથી કર્યો. ‘કભી ખુશી કભી ગમ’ના ‘બોલે ચૂડિયાં...’ ગીત પર આ ગ્રુપના ડાન્સરોએ ડાન્સ કર્યો. અદ્દલ એવો જ જેવો ફિલ્મમાં છે. કૉસ્ચ્યુમ પણ અદ્દલ એવાં જ જેવાં ફિલ્મમાં છે. ગીતના દરેક સીનનું ફિલ્માંકન પણ એક્ઝૅક્ટ એવું જ. ફિલ્મમાં જેમ કરીના કપૂર, હૃતિક રોશન, શાહરુખ ખાન અને કાજોલે ડાન્સ કર્યો હતો એવો જ અને એ જ સ્ટેપ્સ સાથે. હા, એ ફિલ્માંકનમાં અમિતાભ બચ્ચન અને જયા બચ્ચન પણ આવે છે. અલબત્ત, એમાં તમામ કલાકારો ઇન્ડોનેશિયન છે. વીના ફૅન્સ નામની યુટ્યુબ ચૅનલ પર આ વિડિયો બનાવાયો છે.
ફિલ્મમાં જેમ આઠ મિનિટનું આ ગીત છે એટલી જ લંબાઈનું આ ગીત છે. યુટ્યુબ પર જ્યારે આ વિડિયો ચાલી રહ્યો હોય ત્યારે ઇન્સેટમાં ઓરિજિનલ ફિલ્મનો વિડિયો પણ ચાલે છે અને ખરેખર બન્ને વચ્ચેનું સામ્ય દંગ રહી જવાય એવું છે.