સુનામીમાં નાશ પામેલા જંગલમાંથી બન્યું પાંચ માળનું નવુંનક્કોર સ્ટેડિયમ
આ સ્ટેડિયમ છે ખાસ
૨૦૨૦ની ૨૪ જુલાઈથી ૯ ઑગસ્ટ દરમ્યાન જપાનના ટોક્યોમાં ઑલિમ્પિક ગેમ્સ યોજાવાની છે. આ ઇવેન્ટ માટેની તૈયારીઓ રૂપે એક સ્ટેડિયમ બની ગયું છે. એમાં ૨૦૦૦ સ્ક્વેર મીટર જેટલા દેવદારના વૃક્ષનો ઉપયોગ કરવામાં આવ્યો છે. આ લાકડું ૨૦૧૧માં આવેલા સુનામીને કારણે ધ્વસ્ત થયેલા વૃક્ષોમાંથી લેવામાં આવ્યું હતું. સુનામીને કારણે અસરગ્રસ્ત ૪૭ વિસ્તારો પરથી એ ખાસ અહીં લાવવામાં આવ્યા હતા. ૬૦,૦૦૦ લોકોની ક્ષમતા ધરાવતું સ્ટેડિયમ અને ઑલિમ્પિકને લગતી અન્ય સુવિધાઓ ઊભી કરવામાં લગભગ ૧૦,૦૦૦ કરોડ રૂપિયાનો ખર્ચ થશે. આર્કિટેક્ટ કૅન્ગો કુમાએ ડિઝાઇન કરેલા આ સ્ટેડિયમમાં સૌપ્રથમ ફૂટબૉલની ગેમ રમાશે. સ્ટેડિયમ લાકડાનું બનાવવા પાછળ ઇકોફ્રેન્ડલી ઍન્ગલ છે. દેવદારના લાકડાથી અંદર ઠંડક રહેશે અને એમ છતાં એમાં ૧૮૫ મોટા પંખા અને ૮ કૂલિંગ નોઝલ લગાવવામાં આવ્યા છે. ઑલિમ્પિક પત્યા પછી ૨૫ ઑગસ્ટથી ૬ ડિસેમ્બર સુધી પેરાલિમ્પિક પણ અહીં જ યોજાશે. ઑલિમ્પિક માટેના સ્થળમાં ૬૦ ટકા ચીજો રિસાઇકલ્ડ ચીજોમાંથી બનાવવામાં આવી છે. અહીં તમામ લાઇટ્સ સોલર એનર્જીથી જ ચાલશે.
