વસઈમાં બે કલાકના નવજાત શિશુની ડેડ-બૉડી મળી આવી
ADVERTISEMENT
વસઈના વાલીવ વિસ્તારમાંથી ગઈ કાલે ફક્ત બે કલાકના એક નવજાત શિશુની ડેડ-બૉડી મળી આવતાં ખળભળાટ મચી ગયો હતી. આ બેબી-બૉયને જન્મ વખતની નાળ સાથે ખૂબ જ ખરાબ રીતે ફેંકી દીધો હતો અને માનવતાની આ ક્રૂરતા વિશે સમાચાર મળતાં લોકોની ભીડ એ જોવા ઊમટી પડી હતી. પોલીસને શંકા છે કે નવજાત શિશુ ઠંડી સહન કરી શક્યું ન હોવાથી મૃત્યુ પામ્યું હશે.
આ ઘટના વિશે સંપૂર્ણ માહિતી આપતાં વાલીવ પોલીસ-સ્ટેશનના અધિકારીએ ‘મિડ-ડે’ને જણાવ્યું હતું કે ‘વાલીવમાં આવેલી નવજીવન કૉલોની પાસે બેબી-બૉયને પડેલો ત્યાંથી પસાર થતી એક વ્યક્તિએ જોયો હતો. એથી તેણે તરત જ પોલીસને જાણ કરી હતી. અમે ઘટનાસ્થળે પહોંચ્યા એ પહેલાં જ તે મૃત્યુ પામ્યો હતો. અમે જ્યારે વધુ તપાસ કરી ત્યારે ખબર પડી કે બાળકની ડિલિવરી ફક્ત બે કલાક પહેલાં જ થઈ હતી ને જન્મ વખતની નાળ પણ એમ ને એમ જ હતી. વધુપડતી ઠંડી બાળક સહન કરી શક્યું ન હોવાથી મૃત્યુ પામ્યું હતું એવું પ્રાથમિક તપાસમાં જાણવા મળ્યું છે.
ડેડ-બૉડીને પોસ્ટમૉર્ટમ માટે મોકલી આપવામાં આવી છે. અમારી તપાસમાં અમને એટલું જાણવા મળ્યું છે કે બાળકની માતાએ આ ડિલિવરી ઘરે જ કરી હશે, કેમ કે અમે આસપાસની બધી જ હૉસ્પિટલમાં તપાસ કરી છે, પણ આવો કોઈ રેકૉર્ડ અમને જાણવા નથી મળ્યો. મહિલાને બાળક જોઈતું ન હોવાથી તેણે આવું કામ કર્યું હોય એવું લાગી રહ્યું છે. હાલમાં તો અમે અજ્ઞાત મહિલા સામે ગુનો નોંધીને તપાસ હાથ ધરી છે.’
તસવીર : પ્રીતિ ખુમાણ ઠાકુર
