શક્તિ સાથે શિવની આરાધના

Published: 24th October, 2012 06:45 IST

ગોરેગામના નવરાત્રિ ઉત્સવમાં ૨૫ હજાર પંચમુખી રુદ્રાક્ષનું ૧૧ ફૂટ ઊંચું શિવલિંગ



ગોરેગામ (વેસ્ટ)માં એમ. જી. રોડ પર આવેલી શ્રીનગર સોસાયટીમાં નવરાત્રિ થોડા નોખા અંદાજમાં એ રીતે ઊજવાય છે કે તેઓ માતાજીના ગરબા, આરતી અને પૂજન વગેરે સાથે નવરાત્રિ તો ઊજવે જ છે, ઉપરાંત સોસાયટીના કમ્પાઉન્ડમાં માતાજીના કોઈ એક સ્વરૂપની મોટી પ્રતિમા બનાવી દર્શન માટે મૂકે છે અને નવેનવ દિવસ એની પૂજા કરે છે. ગયા વરસે તેમણે વૈષ્ણોદેવીની પ્રતિકૃતિ બનાવી હતી. આ વખતે ૨૫ હજાર પંચમુખી રુદ્રાક્ષનો ઉપયોગ કરીને ૧૧ ફૂટ ઊંચું શિવલિંગ બનાવ્યું છે. નવરાત્રિમાં શિવની આરાધના? જવાબમાં સોસાયટીના સભ્ય ચેતન ભટ્ટ કહે છે, ‘શક્તિ અને શિવ એક સ્વરૂપ છે, એથી આ વખતે અમે શિવલિંગ બનાવ્યું છે, જ્યાં રોજ રુદ્રાભિષેક થાય છે. અષ્ટમીના દિવસે સવારે આઠ વાગ્યાથી ૧૦ વાગ્યા સુધી લઘુરુદ્ર કરવામાં આવ્યો હતો. આજે દશેરાના દિવસે મૂર્તિવિસર્જન પછી શિવલિંગના આ બધા જ રુદ્રાક્ષ સોસોયટીના લોકોને પ્રસાદમાં વહેંચી દેવાશે. અહીંના નવરાત્રિ મહોત્સવને ૫૯મું વરસ છે. ફ્રેન્ડ્સ ક્લબ આયોજિત આ નવરાત્રિમાં આજે પણ લોકો ચંપલ પર્હેયા વિના પારંપરિક રીતે ગરબા રમે છે, માતાના ગરબા અને ગુજરાતી ગીતો જ ગવાય છે, ફિલ્મનું ગીત નથી વગાડાતું અને માતાજીનો ગરબો લેવા જાય ત્યારે અને વળાવે ત્યારે સોસાયટીના ૫૦૦ લોકો સાથે જાય છે. અષ્ટમીએ હવન થાય છે.’

Loading...
 
 
This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK