ગુજરાતમાં મોદીની દસમી ડિસેમ્બર સુધીમા ૬૦ થ્રી-ડી સભા

Published: 26th November, 2012 02:57 IST

પહેલાં ગુજરાતનાં ૨૬ જિલ્લા મથકો પર થ્રી-ડી સભા થશે અને પછી પ્રથમ તબક્કાની ૮૭ બેઠકમાંથી જરૂર લાગે એવી સૌથી મહત્વની ૩૪ બેઠકો પર સભા સંબોધવામાં આવશે



ગયા રવિવારે દેશમાં પહેલી વાર થ્રી-ડી ટેક્નૉલૉજીથી ગુજરાતના અમદાવાદ, રાજકોટ, વડોદરા અને સુરત એમ ચાર શહેરોમાં જાહેર સભા સંબોધ્યા પછી હવે ગુજરાતના મુખ્ય પ્રધાન નરેન્દ્ર મોદી દસમી ડિસેમ્બર સુધીમાં ગુજરાતમાં બીજી ૬૦ થ્રી-ડી જાહેર સભા સંબોધવાના છે. આ સાંઠમાંથી પહેલી ૨૬ જાહેર સભા ગુજરાતનાં ૨૬ જિલ્લા-મથક પર થશે, જ્યારે બાકીની ૩૪ જાહેર સભા પ્રથમ તબક્કાની એવી બેઠકો પર કરવામાં આવશે, જ્યાં મોદી પહોંચી નહીં શક્યા હોય અને નરેન્દ્રભાઈ પહોંચી શકે એવી શક્યતા ન હોય. બીજેપીના કેન્દ્રીય મહામંત્રી પરસોતમ રૂપાલાએ કહ્યું હતું કે ‘થ્રી-ડી જાહેર સભાનો અમને લાભ થયો છે. અગાઉ કરેલી થ્રી-ડી સભામાં યુવાનોની મોટી સંખ્યા આવી હતી અને ટેક્નૉલૉજી જોવા આવેલા આ યુવાનો નરેન્દ્ર મોદીના વિચારોથી જબરદસ્ત પ્રભાવિત થયા હતા. આ જ કારણે હવે નક્કી કરવામાં આવ્યું છે કે નવી ૬૦ થ્રી-ડી સભા કરવી અને યુવાનોને વધુ ને વધુ પાર્ટી તરફ આકર્ષિત કરવા.’

ગુજરાતમાં અગાઉ થયેલી ચાર થ્રી-ડી જાહેર સભા માટે પાર્ટીએ ૧૦૪ કરોડનો ખર્ચ કર્યો હતો. આ વખતે સાંઠ સભા માટે કેટલો ખર્ચ થશે એ વિશે કોઈ કશું કહેવા તૈયાર નથી પણ ધારણા મૂકવામાં આવે છે કે આ સભાઓ માટે અંદાજે એક હજાર કરોડ ખર્ચવામાં આવશે. આ આંકડો દેખાવે મોટો લાગે એ સ્વભાવિક છે પણ સમયની મારામારી વચ્ચે મોદીને તો આ આંકડો નાનો લાગતો હોય એવું બની શકે છે.

Loading...
 
 
This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK