ટ્રાફિક-પોલીસની તિજોરી તગડી કરવામાં આડેધડ પાર્કિંગ નંબર-વન અને ડ્રન્કન ડ્રાઇવિંગ નંબર-ટૂ

Published: 19th December, 2014 06:28 IST

નવેમ્બર સુધીમાં ટ્રાફિકના નિયમભંગ બદલ મુંબઈગરા પાસેથી વીસ કરોડ રૂપિયાનો દંડ વસૂલ કરવામાં આવ્યો



ટ્રાફિક-પોલીસે આ વર્ષે નવેમ્બર સુધીમાં વિવિધ નિયમભંગ બદલ મુંબઈગરા પાસેથી ૨૦ કરોડ રૂપિયાનો દંડ વસૂલ્યો છે. જોકે ટ્રાફિક-પોલીસની તિજોરીમાં દંડવસૂલીના સૌથી વધુ ચાર કરોડ રૂપિયા મુંબઈમાં નો-પાર્કિંગ ઝોનમાં આડેધડ પાર્કિંગના કારણે જમા થયા છે અને ત્યાર બાદ ૩.૨ કરોડ રૂપિયા દારૂ પીને ગાડી ચલાવનારાઓ પાસેથી દંડ પેટે મળ્યા છે.

ટ્રાફિક-પોલીસે ૨૦૧૩માં દંડવસૂલીના ૨૩ કરોડ રૂપિયા તિજોરીમાં જમા કર્યા હતા તેના કરતાં આ રકમ ઓછી છે, પરંતુ ઑફિસરોના જણાવ્યા પ્રમાણે ‘હજી ડિસેમ્બરના દંડવસૂલીના રૂપિયા આમાં ઉમેરાશે. વર્ષના છેલ્લા અઠવાડિયામાં નાતાલ અને થર્ટી-ફર્સ્ટ તેમ જ ન્યુ યર પાર્ટીઓની સીઝનમાં દંડવસૂલી મૅક્સિમમ રહે છે તેથી આ આંકડો તો આસાનીથી પાર થઈ જશે.’

ટ્રાફિક-પોલીસના મૅક્સિમમ કલેક્શનની વાત સમજાવતાં ટ્રાફિક શાખાના જૉઇન્ટ પોલીસ-કમિશનર ડૉ. બી. કે. ઉપાધ્યાયે કહ્યું હતું કે ‘ન્યુ યર અને ગટારી અમાસ જેવા ખાસ પ્રસંગો અને દર અઠવાડિયે શુક્રવાર અને શનિવારે ટ્રાફિક-પોલીસ ડ્રન્કન ડ્રાઇવિંગ કૅમ્પેન ચલાવે છે અને આવા દિવસોમાં જ મૅક્સિમમ કલેક્શન થાય છે. જોકે દારૂ પીને ગાડી ચલાવતા વધુ ને વધુ લોકો પકડાતા હોવાથી હવે લોકો દારૂ પીને ગાડી ચલાવતા પહેલાં વિચારે તે મહત્વનું છે.’

સિગ્નલ તોડવાના કેસોમાં ટ્રાફિક-પોલીસે ત્રીજા નંબરે ૨.૨૬ કરોડ રૂપિયાનો દંડ વસૂલ્યો છે. ઉપરાંત હેલ્મેટ વગર ટૂ-વ્હીલર્સ ચલાવનારાઓ પાસેથી ચોથા નંબરે લગભગ બે કરોડ રૂપિયાનો દંડ વસૂલાયો છે.     

Loading...
 
 
This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK