મુંબઈ : વર્સોવાની આગમાં થયા સતત વીસ મિનિટ સુધી બ્લાસ્ટ

Published: 11th February, 2021 09:45 IST | Mid-day Correspondent | Mumbai

હજી ત્રણ દિવસ પહેલાં જ મીરા રોડમાં આવા ધડાકા થયા બાદ ગઈ કાલે યારી રોડ પર બનેલી ઘટનાએ સિલિન્ડરની સેફ્ટીને લઈને સવાલો ઊભા કર્યા

ગઈ કાલે વર્સોવાના યારી રોડ પર આવેલા એચ.પી.ના ગોડાઉનમાં લાગેલી આગ બુઝાવી રહેલા ફાયર​-બ્રિગેડના જવાનો.
ગઈ કાલે વર્સોવાના યારી રોડ પર આવેલા એચ.પી.ના ગોડાઉનમાં લાગેલી આગ બુઝાવી રહેલા ફાયર​-બ્રિગેડના જવાનો.

અંધેરી (વેસ્ટ)માં વર્સોવાના યારી રોડ ખાતે આવેલા એચપીસીએલ (હિન્દુસ્તાન પેટ્રોલિયમ કૉર્પોરેશન લિમિટેડ)નાં ગૅસ-સિલિન્ડર સ્ટૉક કરવાના ગોડાઉનમાં ગઈ કાલે સવારે ૯.૪૦ વાગ્યે અચાનક આગ ફાટી નીકળી હતી અને ત્યાર બાદ ગૅસ-સિલિન્ડર ફાટવા માંડ્યાં હતાં. એના ધડાકાના કારણે આજુબાજુની સોસાયટીના રહેવાસીઓમાં ગભરાટ ફેલાઈ ગયો હતો. સતત વીસ મિનિટ સુધી બાટલાઓ ફાટ્યા હતા. આ દુર્ઘટનામાં ચાર જણ ઘાયલ થયા છે, જેમને કૂપર હૉસ્પિટલમાં સારવાર માટે દાખલ કરવામાં આવ્યા છે.

વર્સોવાની અંજુમન-એ-ઇસ્લામ સ્કૂલની બાજુમાં જ આવેલા એક માળના ગૅસ-સિલિન્ડરના ગોદામમાં આગ લાગ્યાની જાણ થતાં તરત જ ફાયર-બ્રિગેડનાં ૮ ફાયર-એન્જિન અને ૮ જમ્બો ટૅન્કર ઘટનાસ્થળે ધસી ગયાં હતાં. જોકે એ પહેલાં જ સ્થાનિક લોકોએ ગોડાઉનની નજીકમાં જ કામ કરી રહેલા ચાર મજૂરો દાઝી જતાં તેમને ઉપાડીને કૂપર હૉસ્પિટલ પહોંચાડ્યા હતા.

આગની જાણ થતાં જ એચપીસીએલના અધિકારીઓ, પોલીસ અને બીએમસીના અધિકારીઓ પણ ઘટનાસ્થળે ધસી ગયા હતા. આગ શા કારણે લાગી એની હાલમાં તપાસ ચાલી રહી છે. આગને કારણે ગૅસનાં સિલિન્ડરો ફાટ્યાં હતાં, જેમાં નાનાં ૪-૫ કિલોનાં સિલિન્ડરોની સંખ્યા વધુ હતી. આ ઉપરાંત મોટાં સિલિન્ડરો પણ ફાટ્યાં હતાં તથા ગરમીના કારણે ઘણાં સિલિન્ડરો વાકાં વળી ગયાં હતાં.

Loading...
 
 
This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK