ફ્રાઇંગ પૅન અને પ્રેશર-કુકર પૉલિટિક્સના જંગમાં

Published: 12th October, 2014 04:18 IST

રાષ્ટ્રવાદી કૉન્ગ્રેસે મહિલાઓને આ વસ્તુઓ વહેંચીને ચૂંટણીની આચારસંહિતાનું ઉલ્લંઘન કર્યું હોવાનો શિવસેનાનો આરોપ




વિનય દળવી

લોકસભાની ચૂંટણીનું કાઉન્ટડાઉન શરૂ થઈ ચૂક્યું છે એવામાં દાદર પોલીસે અને ઇલેક્શન કમિશને વરલીના કોલીવાડામાં રહેતા એક રિટાયર્ડ પોલીસ-ઇન્સ્પેક્ટરના ઘરે છાપો મારીને ૧૦૦૦ જેટલા ફ્રાઇંગ પૅન જપ્ત કર્યા હતાં. શિવસેનાના વરલીના ઉમેદવાર સુનીલ શિંદેએ NCPના વિધાનસભ્ય સચિન આહિર દ્વારા તેમની પાર્ટીના પક્ષમાં વોટ જાય એ માટે તેમણે મહિલાઓમાં ફ્રાઇંગ પૅન અને પ્રેશર-કુકર વહેંચવામાં આવ્યાં હોવાનો આરોપ કર્યો હતો. જોકે સચિન આહિરે આ વાતને રદિયો આપ્યો હતો.

રિટાયર્ડ પોલીસ-ઇન્સ્પેક્ટર સુધાકર ઘાગરેએ પોલીસને કહ્યું હતું કે તેમના મંડળ દ્વારા કરવા ચોથના કાર્યક્રમ દરમ્યાન આ ફ્રાઇંગ પૅન મહિલાઓને આપવાનાં હતાં એટલે તેમણે આ વસ્તુઓ ખરીદી હતી અને તેમનું મંડળ કોઈ પૉલિટિકલ પાર્ટી સાથે સંબંધ નથી રાખતું.

દાદર પોલીસે જોકે કહ્યું હતું કે ચૂંટણીની આચારસંહિતા ચાલી રહી છે અને એ મંડળે આવા કોઈ પણ કાર્યક્રમ માટે અગાઉથી કોઈ મંજૂરી નહોતી લીધી એટલે એની સામે તપાસ ચાલી રહી છે.

શિવસેનાના વરલીના ભૂતપૂર્વ વિભાગ-પ્રમુખ હરીશ વરલીકરે કહ્યું હતું કે ‘તેઓ મહિલાઓને ફ્રાઇંગ પૅન અને કુકર વહેંચીને સચિન આહિરને વોટ આપવા માટે કહી રહ્યા હતા. અમને એની જાણ થતાં અમે પોલીસને ખબર આપી હતી.’


Loading...
 
 
This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK